99年11月14日（草馬地）B友

月黑風高6-8，比數小有勝 4:2

今場賽事由於踢夜波，球評家強哥無戴眼鏡下能見度只約五十個 percentage，不便之處敬請原諒。

可能今場踢人造草，加上上星期因某君心情唔好及缺乏照顧下患重病臨時放飛機結果踢唔成，大家都好踴躍，除左阿Ken同阿龍外全部到齊，出席率幾乎100%，可喜可賀。另本場賽事響一片歡笑聲中結束，實驗結果只要陳鍵同昭強唔發老脾，六月都可以飛霜，世界會更美好。

踢成點 ??

龍門

老爺 ─ 幾好，高波好穩陣，今場地波都有。所失兩球非戰之罪。經常望向後備席，眼神曖昧。對於禁區內有人開三人會議清波都無吼叫，場面融洽。

後

肥仔 ─ 負責清波但無做到，多次漏油，好在漏波唔漏人，無點蝕卓，更鋤低曼聯。攻守時都太少幫波，好似唔關佢事咁，令兩閘受困，下次唔該走多兩步。

阿賊 ─ 成場波跳跳扎，好鬼開心，羨慕死人。講番場波，踢右閘時好地地，後尾入中路D波太冒險。下次唔好啦。

昭強 ─ 身為左閘頻頻助攻，雖然輕輕有作用，但留番肥仔一件響後面其實好不智。整體唔特出，係臨尾交左個靚波比朱翁單刀，但朱翁諗得太多結果射失。(今場) 唔發脾氣講得出做得到。

黑奴 ─ 落場時間較短，好難評估，不過都幾落力。走D位好另類，好難交比佢，改﹗陳鍵點名要佢入波，係咁局佢，兩條友都 short short 地。

阿Lee ─ 穩陣左，不過其實唔太適合踢後。有時走得太前，有時追得唔緊。失第二球回傳醫院波比老爺，被對方偷到射入。除陳鍵見義勇為直斥其非，其他人都隻眼開隻眼閉。

鬼佬 ─ 顯示出拼搏精神，起勢咁追，算做到防守工作。略嫌技術力不高，助攻力量較低。

中

小岑 ─ 走動不少，中場有佢有活力好多。拍住陳鍵時踢得零舍醒神。間唔中放下冷箭，都幾凍，對面龍門小心冷親。聲稱衝散左對面主力曼聯，與對方目露凶光，令曼聯發晒火無晒鬥志。

陳鍵 ─ 暫時拋低工作既煩惱，今場有料到，控個波夠哂班，分波亦佳，有佢進攻節奏比以往好。入左球幾好組織既波，被佢自己形容到超晒班，更即席與蕭丹慶功，場面下流。

蕭丹 ─ 踢得唔錯，有D高潮，四處奔走。有做中場防守工作，又有策劃進攻。最不智竟然大開中門比左陳鍵，後果自負…

鬼良 ─ 不失一貫表現，因我隊太多人關係，落場時間唔多。有些少受制於對面新黎既大大舊後位，眼見佢食左幾件三文治。以一球中柱波最顯功夫。

前

朱東 ─ 最醒目今次，一開波就話人地手球，欺騙左人地一個十二碼，更親自操刀了結人地，佢射得好靚啊，人地就慘喇，成場波無晒人生目標。

其餘時間表現有進步，走動多左，稍嫌把握得未夠好，再要比D時間佢，小岑同昭強分別表示曾交靚波比佢但都起唔到腳，下次唔好係禁區唸咁多無謂野，射左先算麻。

徐B ─ 終於無做佈景板，今場算佳作，有多左回傳及走動確係唔同，上倒部的士去禁區，仲比佢入左兩球波。

部分烏合之眾職工賽前表示今場一係打爭氣波，一係就打交，最後果然有整體好表現，起左個頭要好好保持，下場再觀察。