09年12月13日（李鄭屋）對老朱之友

出席: 阿摩, Dee, CEO, Jacky, 老朱, Marco, 羅寶, Rex, 冰, 阿聰(新隊友)
比數: 5比4
入球: 摩(3) 冰(1) 羅寶(1)

又一場經典賽事！

老朱邀約新對手對戰。後生仔體能好，球技亦出色，講真，照秤平均技術可能比烏隊略高一籌，不過，波，並唔係單單講技術．．．（大家記住！）

今場欠缺Mark哥後防指揮，造成開波初段又試立立亂！好快就比對手禁區頂射入一記地波！呢球波之失，除左Dee唔夠集中之外，防守隊友mark唔緊亦係主要原因！

失左一球後，烏隊按照一向以來既劇情發展，開始醒喇，慢慢掌握番比賽節奏。今場中場有好大進步，串連前後做得非常好！尤其是日MVP老朱，勇猛攔截後睇通睇透傳送隊友，令中前場好有活力！可惜Dee犯下錯誤，心急下龍門球開出比阿冰，被阿冰身邊既對手搶奪後推兩步起腳，雖然Dee撲到亦彈內柱入網，落後到０：２。

呢個時候，換出新隊友龍門阿聰，咪睇阿聰戴住副眼鏡斯斯文文，條友仔都好勇下，左飛右飛反應唔輸蝕比Dee！烏合之眾能夠獲得優秀龍門加盟，今後可以有更佳調動！

烏隊其實都有攻擊，亦有起腳機會，不過今場對家龍門手長腳長表現出色，每每令烏隊射門無功而返！

一次對家開角球，急勁地波傳入禁區，烏隊又係唔夠集中，被對方球員衝前撞入近柱！輸到３粒，資深球迷都meet飛走人！

而經典，就係呢個moment締造．．．

季尾足球先生頂班大熱阿摩，忽然醒起今場波有野未做，就係入波！左邊左腳起腳命射，皮球應聲入網！

追返一球，我方士氣大增！加上羅賓趕到，大大加強攻力！亦係由羅賓施展扭波絕技，右路連過幾件後靚絕地波交空晒既阿冰，阿冰施射被龍門撲出，再由阿摩伏兵遠柱執左入網！阿摩已經成為烏隊新一代入球希望啦！

追到接近紀錄，戰情出現急劇變化，烏隊開始重拾控球權！由羅賓同CEO領導既中場線，加上超水準老朱，不斷製造埋門機會！上場棄關出迎熱好晒身既Dee，接應Marco傳送，右路近底回傳Jacky，Jacky再串入禁區，神級射手阿摩遠柱頂入！３：３！Jacky準繩高波＋阿摩頭鎚破網，又再一次出現！呢球波有長有短，組織上可以話滿分！

由睇起上來冇得追到扳成平手，形勢更落係我方，大家開始覺得，今場波贏面好大！不過對家始終有ｄ料到，一時大意又被對家勁射入網，烏隊再度落後！

烏隊一次攻勢，對家犯規，我方快開罰球冰人射入！又追平，吹咩！

呢個時候，連場邊唔識波既女球迷阿Mel，都話烏隊上下半場判若兩隊！入波係其次，大部分時間控制住個皮球先至冇ｘ得頂！最後由今場踢到著晒火既羅賓，左路過兩件後窄位射入遠柱網仔！對方高大龍門波皮都掂唔到，可見呢球波真係刁鑽到暈！

賽事以５：４結束，烏合之眾勝出漂亮一仗！

隊友表現：

阿摩
已經連續好多場有波入，今場更趙入３粒，而且入球係相當有質素既！除左入波，亦組織不少攻勢，冇咩好講，一個字：ｆｉｔ！

Dee
初段守龍不過不失，及後出迎，覺得自己開始踢得番應有水準。包後期間有球與對家前鋒身體對抗，希望隊友們作為參考我成日提既「用身體踢波」。唔知點解踢踢下上到最前，接應羅賓美妙過頭波，禁區頂右邊狂抽，可惜被龍門托出！

CEO
大師兄返番來！CEO有時會嘗試扭下波，我知其實係想利用賽事考驗一下自己既能力，呢個做法我十分認同！中場扭兩腳然後傳交隊友，幫助隊友製造空間！成場波表現相當優異，只係臨尾一球忽略有心事防守時唔夠硬淨。個人認為CEO近幾場踢得好，係因為保持冷靜，道火用係腳下，而唔係咀上！
註：我喝你果下，其實係喝比對家睇，等佢下一球唔敢太放肆

Jacky
愈來愈有球味！從前既Jacky係一名殺人王，有破壞少建設，生兒育女後漸漸變成策動攻擊既角色！由佢高波吊比阿摩頂入一球，可見佢閱讀球賽能力持續上升！間唔中幾球冇乜意識既高波打直吊入禁區，希望日後hold住先再睇定ｄ！

老朱
如果你問我，今場老朱有邊球波特別精彩，我講唔出，但係，情況就好似Mark哥或功夫良一樣，有時係唔需要扭十個或射入金球來表現身價！今場老朱既效率係全隊之冠！防守時死纏爛打，中場搶截＋比波走位，踢前不斷局對方犯錯，今場我比老朱１０盞燈！經過十幾年既觀察，我認為老朱只要克服太飄忽既狀態，必定可以成為另一位可依靠既機動部隊！

Marco
其實我好信賴Marco既防守能力，尤其高空波，絕對係烏隊數一數二！佢既頭鎚指數，肯定最少有９８（昆尼有９９）！有球波佢同對家前鋒搶頂，清脆頂贏，攝個靚位唔係人人都做得到！Marco最大弱點係太客氣，包後時唔多出聲，其實啦士最主要就係指揮，叫隊友補位mark人，千祈唔好覺得好似「老點」隊友，CEO成日話大家要互相提場，呢樣野好重要！只要Marco做到呢點，以佢既能力絕對勝任Mark哥既包後工作！

羅賓
本來今場１００分，遲到就即管扣０．０１分啦！冇羅賓，大家進攻時好似冇左目標！羅賓最那犀利既地方，唔係扭十件ｏｒ射金球，而係佢落場後可以帶動隊友踢得更好更積極！作為重心球員，我知場場波羅賓都踢得好辛苦，但係佢從來冇埋怨隊友，當隊友不在狀態時，佢一個人擔起成頭家！今場右路連扭數件起腳，被龍門擋出！唔忿氣左路又試連扭數件射網仔，用行動證明「想mark我冇咁易」！有球輸半個身位下死追迫甩對手，係今場最美妙防守！

Rex
防守能力可以用恐怖來形容！Rex係烏隊中，少數懂得利用身體對抗既隊友！加上體力好，打閘經常上到前半場助攻，翼衛最佳示範！可能Rex屬於進取型，有時企位較前，變得ｄ波好冒險，閘位橫傳遇上靈活對手好易被搶截，細場有ｄ唔著數。

冰人
好少見冰人踢到訓晒地，今場佢出晒１２０％奶力！上佳既控球能力，接應後場傳送，被對手緊迫下仍然可以hold住，再睇到定交空，腳下功夫了得！因為初段羅賓未到，hold住個波搵唔到人交，因為咁消耗唔少體力！有球羅賓拉空晒交比佢，單對單面對龍門飛到盡僅僅射斜！

阿聰（新隊友）
身手唔錯，守龍肯飛肯撲鬥志勝於一切！今場表現對辨，可獲自動升呢成為金白會員！

檢討：

1. 其實今場打後隊友相當稱職，可惜始終缺乏Mark哥果種指揮若定既風範！啦士位其實最重要係lead住條防線，多ｄ提點隊友尤其二閘點解配合防守陣法！今場波來講，除左老牌清道夫Dee包後時間叫做勉強做得番少少Mark哥既指揮工作，其他隊友包後太少出聲！Dee絕對唔係比大家好波，只係聲氣比較多，今後大家多ｄ提場！

2. 進攻時節奏快慢到底應該點樣掌握？有時空晒都唔交，有時隊友都未知發生咩事就胡亂交左出去。我覺得係冇既定標準，不過，當大家體力開始下降，或對家牌面比我方高時，不妨多選擇控球在腳，做唔到再做過，冇咁辛苦。

3. 今場波老朱、阿摩各１００分，羅賓９９．９９分，其餘隊友９９分！

整體表現：爆
開心指數：爆

09年12月6日（摩士）對 CEO之友

出席: Mark, 阿摩, Dee, CEO, Jacky, 老朱, 超, Marco
比數: 7比幾
入球: 摩(2) CEO(2) Mark(1) Dee(1) 超(1)

今場烏隊派出元老軍團出戰，老波骨體能有限公司，見對家迫得唔緊，於是CEO提出嘗試控球在腳搓波仔，估唔到效果又唔錯！雖然賽果唔知贏輸，但個人覺得踢得幾開心！

對家冇緊迫，但技術唔太差又後生，能夠踢小組而入到７粒，係好值得CEO請食飯！先同大家重溫精彩入球經過！（次序唔記得）

１）
Jacky交阿摩，阿摩半單刀推兩步地波輕易掃入

２）
CEO右路冇驚無神放冷箭band入

３）
老朱靚絕頭鎚二傳，Dee左腳撞射入網

４）
又係Jacky同阿摩黎一個大三角，最後Jacky高波撞比阿摩頂入

５）
Mark（當時幫緊外隊）接應角球清脆跳頂入網

６）
阿超右路近中場吊入禁區，結果笠死客串對家守龍既Mark哥

７）
Dee符碌過一件後交空CEO，CEO順勢左腳彈入

今場入球最大特色，係最後交果腳都幾靚，老朱set比Dee既頭鎚，可見老朱上三路真係唔錯；Jacky阿摩大三角，Jacky閱讀球賽能力佳！

球員表現：
阿摩
呢期好似食左過期偉哥咁fit！除左連續幾場梅開二度，今場佢同老朱係前場不斷搶截，做唔少野！烏合之眾足球先生大熱之選！

老朱
雖然冇波入，但貢獻良多！除左頭鎚二傳，有球接應Dee直線標前搶點起左腳狂抽，可惜僅僅高出！亦有球怒射中柱，咁都入唔到，只係樣既問題，同技術無關。

Mark
多次上到前場整色整水，表現出一向以來收收埋埋既進攻能力！尤其客串對家一段時間，更加忍唔住施展隱藏扭波絕技，真係比佢嚇Q死！

Jacky
今場唔起眼但係非常有效率！放長波睇得好通透，拉兩邊空晒！有球烏隊撞左三、四腳後，Jacky接應阿超（後經證實係控甩）半車身喪band，僅越眉而出！

CEO
今場終於表現出最在行既中場指揮工作！串連前後、駁腳、舖橋搭路，令中場機動力大增！趙入兩粒，當中更包括一野遠程炮，唔該keep住呢道火！

Dee
十世唔入波都省番粒先！不過老朱set得咁靚，如果唔入真係對老朱唔住！開波初段守龍亦飛出一記半死角，先打窒對家道氣。

Marco
榮升爹地後復出，幾次出次無壓力下失誤，狀態有待提升。

總結
雖然事實上對家迫得唔緊，我方可以睇到定晒慢搓，但係起碼又搓得到！今場大家冇渣流灘不斷走位，令對家比我方搓到索晒氣，未段甚至出現冇晒力追既情況！掌聲鼓勵今場既隊友！希望今後爭取機會練習多ｄ小組進攻！

整體表現：叻叻叻叻
開心指數：笑笑笑笑笑

09年11月29日（李鄭屋古墓）對 Eric 工友

出席: Amor, Jacky, Kin, Rex, Mark, Yui, Sing, Bing, Andy, Dee, Ah Fai, Bing's friends x 3
比數: 大比數
入球: 講唔晒
攻: 還可以，有球員投訴對方攔截偶有多手多腳
守: 水準以下，人不在其位，好多時比人 one two
評: 在經常無對手的情況下，可以翻灼

整體表現：叻叻　
開心指數：笑笑

09年10月18日（李鄭屋古墓）對 羅賓朋友

有踢：Mark, Jacky, Amor, Bing, Robbie, Eric, Ah Fai, Andrew, Eric

請善心既巴打提供比數...

09年10月11日（李鄭屋古墓）對 HSBC之友

到 : Mark, Edmond, Jacky, Amor, Andy, Kin, Ah Fai, Rex, Ah Chiu, Bing
比數 : 7比5

冰人大演帽子戲法, 勁入4粒, 其餘 Amor, Jacky 同零碼連尼加都各入一球．．．賽事精彩絕倫，觀眾目不暇給。

由於烏隊全程處於領先地位，而對方亦都追得好緊，無論場內，場外不時都有人傳出：

"eee.. 完場喇 !?" (其實仲有20分鐘)

"啊，不如踢埋呢球"

"0華，落雨添，個地好冼 wor"

"ok，喇史一球"

最後亦係6比5之濟踢埋 last 一球，由冰人成功埋單，策略性擊倒對方！！烏合之眾好野!!

09年9月20日（李鄭屋古墓）對 Robbie之友

有到: Mark, Jacky, Amor, Edmond, Robbie, Yui, Kin, Sing, Javier, Andy, Andrew, Ah Fai, Karl
比數: 好似結果都係贏... 頗輕鬆

09年9月13日（李鄭屋古墓）對 CEO之友

出席: Mark, 阿摩, Bag, Dee, 輝, CEO, Jacky, Sam, Bag友, 老朱, 阿榮

比數: 6比2

入球: Bag (6)

今場天氣認真惡頂！唔算曬但係非常「藝局」，走兩步已經流晒大汗兼夾呼吸困難！好在唔覺唔覺都有大拿拿十件同場，叫做可以車輪對手。

賽事焦點A

有冇搞錯！一人包辦６粒？今場Bag鬼上身，無視對手（及隊友）既存在，扭九個射網仔，係一次超級技術（及獨食）既示範！

賽事焦點B

賽前有多口隊友指出，老朱同榮少命格相沖，如果老朱黎，榮少就唔黎；榮少黎老朱就唔黎；如果兩個都黎，就會落雨。今場兩員猛將終於相逢恨晚，更天公造美，唯一美中不足，係未能見到老朱餵靚波比榮少零碼撞入。個人認為兩兜友可以考慮夾份買雷曼，邪鬥邪分分鐘中金多寶！

整體表現

前線

點講呢？睇到Bag大炒６粒，表面好似爆晒燈，但係冇咗冰人同阿牛，梗係踢唔番烏合之眾既進攻模式，甚至可以話冇乜模式可言！唔係話炒６粒仲要計較點入，不過始終冇可能場場要求Bag一個打十個！除咗埋齋一球叫做有番ｄ組織性之外，相比起Bag所入既高難度入球，講真我寧願踢簡單足球大家舒舒服服又一粒！

中場

致命傷係欠缺攔截力，比對手好容易去到三閘位滲入。Jacky今場打後，星爺又缺席，發覺原來烏隊能夠扮演防守中場既球員極少！另外冇咗羅賓中場串連分波，亦係今場進攻路數單調既原因！

後防

今場最差既一條線！唔知點解比對手一次又一次直線插穿！小弟發現，如果對手平均好扭，我方就會不自覺兩個步一個，然後就演變成被對手搓散！我認為：

a) 唔需要太在意比人扭過而亂章，人地好扭，輸波無話可說，寧願踢番正路波

b) 二打一，應該派一人當機立斷去標去搶，留另一人包

清道夫之王Mark哥包後唔等於踢得晒，都需要左右閘幫波，今場冇咗Rex同銳哥，左右閘防守能力不足。尾段終於踢得番正常水準，一個跟一個就算比人扭過其實都唔蝕卓！

球員直擊

Mark

表現不及平日咁搶鏡，除咗缺乏隊友支援，個人狀態似乎亦有少少回落。不過講時講，我從來都唔認為一隊波入面既leader，一定係踢得最好果個，又或者場場都要踢到識飛，領軍能力同感染力，好多時候同表現甚至技術無乜關係！

阿摩

近來場場都有高水準演出！有球波睇到空晒中場右路扯個長波比左邊近禁區頂CEO，可惜未能造成入球，打破Bag玩ｘ晒既局面！

Bag

我動議以後再有隊友一場入４粒或以上，即時自動升呢做白金會員，預繳十年會費！今場入波模式係，總之是ｘ但交個波比Bag啦，然後佢就入咗。第一粒左路邊線死位開始，被對手夾擊下依然轉到身，然後一路扭呀～扭，扭到入小禁區掃埋入網，係金球中既金球！

Dee

因為樓上條友痴咗線，今場連守龍都呃到兩次助攻！總之是ｘ但交個波比Bag啦，然後佢就入咗。其餘時間係咁依撲咗兩野單刀。

輝

Keep住一向水準，輝哥仔係實而不華型，個性內斂，默默做咗好多野都唔會話比人知，唔同隔離鄰舍打招呼果隻。行為同變態殺手近似。

CEO

CEO係一位踢鬥志既球員，對手愈狼，我方愈不濟，佢就會踢出代表作。相反如果好似今場咁，斯文型對手，而（某）隊友鬼上身，佢就會稍為收歛一下自己。今場數次門前空晒都唔入，ｄ射術真係要搞搞佢好喎！

註：今場初段客串咗對江一陣

Jacky

到場先發覺唔記得帶鞋，未開波已經打窒道氣！唔知係咪掛念賽後買單車既事，今場表現屬一般咁上下，印象中有球遠射似似地。

Sam

可能太耐冇落場，箭咀向下，多ｄ黎操番起就冇問題！

Bag友

幾好扭，但好似扭得太多，技術唔差，不如一齊踢小組好過啦！

老朱

老朱依家既問題係，到底佢應該踢前定後？踢前佢頭鎚二傳唔錯，但搶奪能力唔及CEO同阿牛。踢後高波一流，今場更頂贏頭鎚了得既CEO，不過唔係踢後出身，位置感仲有待加強。我建議老朱先諗定攻or守先，然後慢慢鑽研當中奧妙。

榮少

稀客榮少亮相，未有表演「零碼連尼加」絕技，可惜～可惜～

結論

a) 平時既穩膽（Mark哥、Jacky、CEO等）今場一般，最後依然大勝而回，除咗Bag食咗偉哥，亦可見隊友愈來愈穩定！

b) 三線都有球員缺席（例如：銳哥、牛、星爺、Marco、羅賓、冰人、Rex等），結果三線既實力都受到影響。

c) 咦，原來今場缺席既隊友，已經可以組成一隊齊晒三線既波喎，咁咪即係話烏隊愈來愈人材仔仔！！？？

整體表現：叻叻　（Bag個人：叻叻叻叻叻）

開心指數：笑笑笑

To Bag：入咁ｘ多，點記得呀！？唔該自己講番出黎比隊友分享下！

09年8月16日（李鄭屋古墓）對朱朋

出席 : Mark, Dee, Sing, Amor, Kin, Jacky, Eric

賽果 : 好似贏2比1

09年8月8日（將軍澳寶翠大草場）對 朱朋好友

出席: Mark, 阿摩, Rex, 冰, Bag, Dee, 雄仔哥哥, 阿賊, 肥丘　+　多位外援
比數: 1比5
破蛋人: 肥丘

老朱因傷缺席，祝早日康復歸隊！另，真係好開心見番阿賊同肥丘兩名好波之人回歸，希望兩位大哥日後可以多ｄ參與賽事！

大比數落敗，主要原因似乎包括：
1. 烏合之眾向來比較少踢大草場，唔係好適應
2. 太多外援，太少自己人，默契嚴重不足
3. Dee又試狀態低迷

可能因為上述藉口，各隊友雖然都好落力，但好似冇平時咁有heart。上半場因為我方忽然出現一位身手唔錯既外援龍門，所以 阿Dee 走左過對家守。

＊上半場咬住 1比2

初段雙方都係中場亂戰，烏隊始終唔係大波底，太多後場無謂盤扭，比對手截到又造成後防壓力。另一方面，今場後防唔夠硬淨，嘜人方面有ｄ亂，高空波更可謂輸晒！結果無耐就比對手憑右邊角球及右路底線傳中，連失兩粒！

及後烏隊進行反撲，阿摩左路多次發難，製造唔少威脅，亦係今場MVP之選！阿賊亦算保持昔日風采，一扭一傳尚見功架。而雄仔哥哥更加係好波到冇人有，放ｄ長傳同直線準到ｘ街！有球佢直線交比冰人，冰人禁區頂接應飛人臥射僅僅出界，可見冰人平時收收埋埋，原來咁高危既動作佢都好耍家！後來一名外援施射，小弟（當時係對家龍門）擋出不遠，阿摩失驚無神殺到入小禁區補射，可惜抄波底高出！錯失一次黃金機會！

經過一番努力，烏隊終於開齋！雄仔哥哥中場一記高波斬入禁區，對手後衛漏頂，由肥丘小禁區左角附近一頂，皮球呈拋物線笠入遠柱死到唔死角，追回接近比數！小弟失手比我非常欣賞既超級後衛肥丘，果個內心都不禁為佢喝采！

＊下半場支持唔住輸 1比5

中場休息，賽事再度展開，小弟亦回歸烏隊。其後由於小弟今場嚴重不在狀態，係咁失ｄ平時絕對唔會失既波，最後被趙入3粒收工。

＊搶鏡隊友逐個捉：

阿摩
烏隊中睇黎比較適應踢大場既球員。左路非常活躍，大步一推，推過對手後沉底出波，簡簡單單但係非常有效率！選今場烏隊MVP小弟投佢神聖一票！

冰人
缺乏其他前場隊友支援，加上我方實在寥寥可數既攻勢，今場冰人埋門機會唔多，幾乎就只有雄仔哥哥比直線一球，不過佢都能夠把握機會製造一次射門，雖然唔入都值得比掌聲佢！

雄仔哥哥
我方攻擊唔多，而大部份攻擊都係由佢策動！中場多番放長波、比直線，睇通球賽！Mark哥不妨將烏隊既賽事精華forward比佢重溫，等佢知道我地係幾咁渴望佢既加盟！

阿賊
久休復出，波底尤在！現階段只係默契不足，多ｄ出席應該好快重拾「毫七子」既魅力！

肥丘
想當年「Mark哥 + 肥丘」呢對後防「人肉 partner」，一個領軍一個殺波，可謂夢幻組合！肥丘身材夠闊，難得跑得又快，一般業餘前鋒都幾難過到佢！後來欠缺佢助陣既日子，總係叫人口淡淡！一復出即入番球先，睬你都傻！

阿Dee
搶鏡係因為踢得差！更悲壯既係包辦今場雙方全部失球！回家後已自行面壁思過，希望各位大佬比次機會．．．

整體表現：叻
開心指數：笑笑

09年7月26日Mark哥生日（李鄭屋）對 CEO臨時球隊

出席: Mark, 阿摩, Rex, Kin, 銳少, 冰, Bag, 星, 阿輝
比數:（的士台呼籲出席隊友提供）
入球:（的士台呼籲出席隊友提供）

特別鳴謝 Kin Kin 撰寫賽後報告

整場比賽沒什麼特別，所以只節錄如下：
優點係：輸波時可以努力反撲
缺點係：贏波過份鬆散

隊友表現，請各隊友分別從第一欄及第二欄自行連線，以選擇適合你的形容詞：

人物－勝在〔 第一欄〕－略嫌〔 第二欄〕　

例句一：Angelababy 勝在靚女略嫌唔夠好波

例句二：色情攬枕勝在就手略嫌岸七九

Mark哥 ．敢言敢行 ．無氣無力
阿Rex ．技術不俗 ．個人主議
銳少 ．身位特出 ．射術反覆
冰人 ．機靈勇猛 ．傳球輕率
Kin Kin ．全能通天 ．有心無力
阿Bag ．超級實力 ．一場半場
星君 ．靈魂人物 ．唔夠靚仔
阿摩 ．技術出眾 ．沉實不足

Model Answer 請向 CEO 以郵遞方式索取
Hits：特別一提，銳少踢得好好！

以上只反映本場之讀後感，如有雷同及未能反映事實之全部，勿插！！
其實本人有少許意見，大家可以相討一下：
1. 如有朋友，可邀請加入
2. 這個有助補充新血，亦可幫助明星賽的進行

（編按）

【球會通訊】

經過連日來打探業餘比賽一事，初步結果顯示，如果以打聯賽循環方式參賽，費用會非常高（成幾叉野），淘汰制又可能一場就玩完（回唔到本），加上部份隊友亦未有表態，所以短期內應該唔會參加住啦。

小弟亦有諗過，如果有多幾隊固定對手，或者可以圍內搞個小聯賽玩吓。假設有6隊波，打兩循環，主客制．．．等等。都係初步諗法，大家可以比ｄ意見。

所以，小弟認為點都要開發多ｄ對手。我會開始嘗試留意吓網絡上有冇球隊約戰，希望可以同多ｄ唔同類型對手比賽，汲取經驗值，爭取升呢。

有一點想提出，可能有時會因為雙方發生衝突，令對手流失。小弟先強調一點，無論點都好，我絕對撐我既隊友！我亦冇針對邊位隊友，始終贏波、輸波、打交都係整體既，不過希望大家唔需要太上頭，無謂發生不必要既球場暴力事件啦～

歡迎各隊友比多ｄ意見，令球會業務蒸蒸日上，三年抱兩！

老編 dee 上

09年7月12日（草馬地仿真跑場）對 EUFC

出席: Mark, Jacky, Dee, Marco, 冰, 老朱, 徐B, 康, Martin, 雄, 輝
比數: 2:0　（老朱、Martin）

多位隊友未能出席，特別鳴謝 Mark 哥調動外援幫拖，兩位外援（雄、輝）有料到唔在講，三十九幾度中午一點開波曬到ｐｋ都到場助陣果吓夠晒老友！

為左響應某球會高層提早 10 分鐘到場既口號，又怕紅隧塞車所以小弟早左好多出門口，結果1230 就到左，好多其他隊友亦響應「十分早到運動」，令到烏隊未夠1pm已經齊人開波，實在係烏隊近年既大喜事，希望大家可以 keep 倒。

今場莫講話落場踢，就連場邊睇波人士，齋坐都熱到差ｄ中暑，心諗今場都係兇多吉小，估唔到踢落又唔係咁講法喎，整場波各位隊員力拚到底，最後一滴奶力都搾埋出黎，結果淨勝兩粒收工，不論表現同賽果都令人滿意！

球員直擊

最主要原因，係今場兩位外援真係好好波！輝哥一睇個樣就知係可靠顧家既好男人，打閘夠穩鎮簡單直接，須知道大波踢法後衛真係唔能夠拖泥帶水，事關比人迫甩好多時候都無得追。輝哥可能平時同 Mark 哥夾開，所以二人頗有默契！另一方面佢亦可以引球出擊，始終閘位可以參與助攻一定著數ｄ！

而外表睇起來比我地成熟唔少，但係竟然比 Mark 哥稱之為雄"仔"既，更加係一位烏隊極之缺乏既技術型好波之人！射龍門熱身時，腳腳彎死位，我真係波皮都掂唔到！正式落場，雄仔踢中場較炮非常準繩，更不斷放出致命直線，踢大波如果中場分波準，隊友又配合到，真係企定定都夠踢！今場所入兩球亦由佢包辦助攻，可見閱讀球賽能力極高！

至於被 CEO 高度激賞、傳說中既猛人 Martin，小弟終於有機會同佢打番場友誼波。Martin 似乎係屬於 Karl 果種速度型球員，爆邊線沉底出波功架十足！初步觀感，Karl 單騎突破多ｄ，Martin 就多ｄ同隊友做 one two。今場接應雄仔美妙傳送突破埋越位射入一球，希望佢可以成為另一位數糊人物！（事關依家入球太側重一兩位隊友喇～）

而退隱多年既烏合之眾前朝元老徐B，可謂寶刀未老！其實徐老B射術真係歷代烏隊之中比較出色既一位，亦夠腳頭，講到打前真係數一數二，不過佢有陣時會太過個人主義，搞到同隊波硬係夾唔埋欄。今場徐B響前線為對手製造唔少麻煩，個人突破能力唔錯，亦多次嘗試起腳，可惜每每省中血肉人城無功而返！如果球迷有興趣重溫徐老B昔日風采，可以瀏覽烏隊舊日既賽事精華。

做左人老豆既泰仔康，因為終於遇到比佢更加野蠻既民族（即係佢個ｂｂ女），所以道火可以話熄左九成！久疏戰陣加上身懷六甲，只係落場十零分鐘就頂唔順提早散席，希望佢同個女傾掂數多ｄ參與賽事，操番 fitｄ，重拾當年球壇泰米爾遊擊隊既風采！而佢守龍撲單刀更加有獨到心得，就係最鍾意人地單刀，可見佢天生就係一個嗜血既狂人！

由於今場對手攻擊未見猛烈，加上左右閘能夠經常上前助攻，整場波 Mark 哥都頗為清閒。今場踢大波發揮到 Mark 哥既準確既長傳，有時啦士位一腳放上去，交比前線球員追，咁又造成一個攻勢，簡單而致命！

一場波 Jacky 有冇搶鏡演出，係要睇對手既。對手愈粗獷，Jacky 愈狂野！作為烏隊中既廣州殺人王，因為佢有體力又夠勇悍，一向以來，佢都係唯一一個有能力箝制對方箭頭或主力球員既冷凍專家！遇上斯文ｄ或者好似今場咁攻擊力比較弱既對手，佢就少ｄ表現機會！

Marco 既制空能力，肯定係烏隊三甲人選，明明個位蝕晒，唔知點解都頂到個波！小弟高波弱ｄ，所以有佢打後我放心好多！今場 Marco 多左上前參與助攻，平時收埋收埋，原來同隊友玩小組突破都唔曳！今場空位較多，右邊不斷引球出擊，更加去到心臟地帶，如果可以起埋腳，咁我地既進攻瓣數會有更多變化！

就算話我長氣都要講，冰人保護皮球既能力，真係──無．諗．得．頂！放個長波上去，冰人控定→hold一陣→有時過一兩件→再傳比隊友→自己走位，呢吓絕招，絕對係烏隊中演繹得最好！況且，一個前鋒可以唔貪功而又經常有波入，真係好神怪！今場出左唔少次絕招，甚至對手派出幾名球員夾擊佢都一樣冇甩拖，雖然冇入波但功不可沒！

情況愈不利，我地既老朱鬥志愈頑強！今場三十九幾度，企響度都扣油，於是老朱又試有出色既演出！老朱唔係果種喪爆邊線或扭九個既球員，不過始終踢小型球出身，比較全面，踢前都唔係話吓吓盲目向前湧！另一方面，可能佢近年多左踢大波，適應大場踢法，空位多ｄ，唔使好似細場咁要有好好既技術去護住個波，有時甩甩地反而更適合起腳（以上內容絕冇諷刺成份），加上佢走位又確係幾鬼馬，所以今場射入一粒都抵佢！

因為對手今場表現一般，烏隊各後防大佬又做到野，所以 Dee 今場大部份時間只係負責叫囂打吓氣。成場波淨係撲左一下射門同一次1/3單刀，兩次既危險性都極低。

雖然有好波外援幫拖，其實今場算係半地庄，不過今場波又再一次證實，如果對手迫得冇咁緊，我地係可以踢得好好多！至於點解破解呢個困局？呢個，係一個謎．．．

整體表現：叻叻叻
開心指數：笑笑笑笑

09年7月5日（李鄭屋）明星賽迷你版

出席: Mark, Jacky, CEO, Sing, Karl, Dee, 摩, Marco, 冰, Rex

開波前兩粒鐘個天仲落緊雨，球會主動打電話比球員交帶場波照踢，可見高層相當有責任感，亦反映大家對足球仍然好有熱誠！相信大家對球會既滿意度將會突破新高！

開波前落大雨，但係去到球場唔單只停晒，塊地仲乾過我個銀行戶口！天公造美也！

本來諗住走番場精彩既 all-star 大戰，雖然最終因為唔夠腳隨機應變為迷你版，不過踢半場大家練習吓小組，都好開心。如果大家 ok，或者以後就算得八件都照去馬，玩吓半場操吓波。

末段同長沙灣當區 "唔著鞋" 球隊拍跳半粒鐘，賽果2：1，由於唔係官方賽事，所以係唔會落 file既，個別球員表現亦不能作準（懶得寫）。比較值得留意既係，根據戰況，反映出如果對手唔用壓迫性踢法，大部分球員都踢得比較得心應手。相反如果對手局得緊，就算對手本來唔太強，我方都會踢得差ｄ。

經黃龍德會計師統計，烏隊存在既問題可能有：

1. 體力下降 － 呢樣野都冇辦法喇。
2. 每場波人腳未必平均 － 呢樣都冇計，唯有希望大家多ｄ出席啦，不過如果齊腳，希望換人盡量按照位置來調動
3. 運用皮球能力依然有待改善 － 走位、傳送、接應、製造埋門機會．．．等等，仲有發展空間，大家努力！

希望以後如果再有約唔到對手既情況，而烏隊又有起碼八件ｏｋ，都照踢當練波，玩半場，搓落磨，射龍門．．．事實上我相信各位同小弟一樣，由唔識踢波到今時今日叫做知道踢波係乜野，都係因為不斷地重複以上所講既動作。平時到場就即刻開波，踢完就閃，實在冇乜機會鍛鍊吓ｄ基本野。

而且，諗番轉頭，以前細個熱愛足球，都唔係因為次次鬥波丫！我記得就算得兩個人互射十二碼，都係一件令人好回味既樂事～～

後記：Rex 自己友四打四個時都勁 band，無人性啊

09年6月28日（李鄭屋）對 mark 哥同學

出席: Mark, Jacky, CEO, Edmond, Sing, Karl, 銳
比數: 反勝 5 : 2

賽後報告（吵架事件）【文：路人甲】

以下內容純屬路人甲之意見，並不代表本球會之立場。

一開波烏合之眾驚魂未定，霎眼間就輸左兩球，令到對方開始氣焰。好在我方對“先輸波”呢個盤口見怪不怪，好快就由我地十世唔入波既老朱連剿兩粒閃電扳平。故事既敘幕就係咁樣開始．．．

賽事進行至 63.8 分鐘（有30分鐘是遲到既關係，5分鐘熱身，2分鐘叫人開波），球員光頭西 （化名）在我方峨眉月頂接了隊友之傳球，正想發爛，但受制我方 Wilson Tang（據說是曼加拉的國腳）的騷擾，動彈不得，於是光頭西一招“發爛渣”，人波不理，揮袖而去，在無可奈何之下，烏隊只好把皮球送回對方半場。

賽事又繼續展開，老朱不知是否吃了春藥，把一生人的入球都在這場球賽展示出來（賽後記者提問有關事宜，他毫不忌諱說是因為跟那個什麼“榮榮”的女人分手了，以後一刀兩斷，所以化悲憤為力量，把皮球當作是那個“榮榮”）看又是一球…出界，再來一球中眉，可能是這樣令對手以為烏隊在玩弄他們，明明是單刀，明明是必入球也不入，不會吧，一定是他在作弄我們，因而引發下來的事件。

到了賽事 71.2 分鐘，黑衣人把球踢到快要出對方底線，在前線非常活躍的牛（不是動物是人），只管出力去把皮球從底線之前撈回來，不幸之事就在這時發生，一閃眼間光頭西又再出現，他似乎對有過度活躍証的牛牛不滿，橫身就把牛牛撞至出場，事後經黃綠醫生證實牛牛有可能沒有以往那麼靚仔。當場牛牛立時向對方光頭西理論，節錄如下：

牛牛: 「0畏，你有沒有搞錯什麼啊? 」
光頭西: 「幹什麼，我又沒出腳! 」

就沒有出腳一詞，記者在賽後就向國際裁判陳談新請示，有關陳之講解請查看“青年報” 第9千1百10期A4.2版或瀏覽 http://lfs-soccer.blogspot.com/

此後為免不快，大家都休息去了，10分鐘過後，有人不滿球賽太過技離，要求從速開球。就在 3 分鐘內，老朱又再下一城，射破對方的十指關。大事不妙，這十指關不是他人，正是光頭西本人，眼看光頭西的小宇宙已到了極點，任何人只要跟他有氣流接觸都會沒命，但是大家卻又不已為然，而光頭西也走出來運球，一股殺氣緊緊的包圍住他。經歷風吹雨打的老朱當然懂得看風使舵，但年少無知的牛牛又怎知社會的險惡呢，就在光頭西運氣盤球時，牛牛走到他身邊，一心只希望把皮球搶回來，身體正向光頭西側去，手腳還沒出動，光頭西就已經射出一球歐偉倫式的怒射，鍵鍵當時正在守門員的位置，他等了大約 3-4 分鐘時間才等到皮球到達，一抱入懷。光頭西之氣勁已一發不可收拾，他發功，手指指向著牛牛說道：

光頭西: 「你再黎吖，我XY%^&…..」
牛牛也不示弱
牛牛: 「 &*^^%45$%XYWD」

混亂當中老朱入位，小了光頭西兩句．．期間對方更邀請我方球員“出去走一轉”（註：古時的社團用語，意思大概是指找一個較空曠或較少人的地方，作單對單搏擊），“烏”隊球員即時露出一臉反眼，無人0采佢之下，就此完場！！

【本故事純粹寫作，mark 哥不喜勿插】

球迷世界之 "Once Upon A Time My Dream Team..." 【文：小昭】

德國仔，我等左你地十九幾年啦！

由五年班第一日學人踢波開始，已經決定要走上德國fans呢條不歸路！你地都唔知，果陣時細細個要同人講鍾意德國，好ｘ大壓力架！德國冇巴西咁華麗係咁入波（細路仔甚至大人都鍾意睇入波架啦），冇荷蘭咁有星味，又冇意大利咁令仔，真係乜ｘ都冇！

都有野既，戰術囉，鬥志囉，心理質數囉。睇波同睇女一樣，都係睇好唔好波o者，戰術真係關我ｘ事！好多人咁諗。

不過，響我心目中，咁先至係踢波！

果ｄ唔識波既人成日話，「德國？好那悶架喎！」、「挑！成ｘ日搓搓搓，搓ｘ到完場！」、「一ｄ技術都冇！」．．．

咁你地就錯九晒啦！德國仔崇尚既控球在腳，其實係技術成份好高既踢法。要搞清楚喎，對於高水準足球來講，難，笨唔係傳來傳去唔交失咁簡單，而係就算落後緊，都依然按照自己既節奏同戰術保持住個控球權。

如果唔夠冷靜、唔夠自信、唔夠團結，係絕對踢唔出呢種波來既。

假如話，對住賤精意大利，響開波一分鐘就比佢地領先，咁場波好大機會比佢地後場喪搓之下一比零谷ｘ住度氣完場。咁德國仔呢？對住佢地，就算領先幾多粒都好，個球証未吹雞，都咪以為已經贏左呢隊可能係全世界最有耐性同最有韌力既隊球。

86世界杯，當時既鐵血西德有路明尼加+大巴司機+舒密加+禾拉+馬圖斯+K科士打+亞羅夫斯+漢尼斯．．．咁樣既陣容，邊ｘ個夠膽話佢地唔好波！

可惜，德國仔有幾多球星都好，對家，有件當年屈ｘ晒機既馬勒當拿。

到左90年，領隊碧根包事先張揚話當屆既陣容比上屆更勁！咁，上屆都拎亞軍嘞．．．佢老人家又話，咁多隊淨係驚荷蘭仔，咁，十六強又比佢過埋關嘞．．．

馬圖斯喪奔90分鐘唔扯蝦、布林美落西西到個波番轉頭、奇連士文好似癲狗咁追到出馬路、仲有尹巴士頓個friend高拿，締造左一個時代既經典。

機動力同打不死，踢波做人溝女都應該有咁既精神。

以上都係封晒塵既歷史喇。自從以光芒萬丈既姿態贏左90世界杯之後，嘩，好似陽痿咁一厥不振，最令忠實球迷如本人痛心疾首，係唔知邊條蛋散引入七尺前鋒高空轟炸戰術。仆街！睇到把ｘ火！雖然贏左個96歐洲杯，不過除左清道夫森馬之外，成隊波一ｄ好感都冇！（話時話森馬真係好ｘ堅！成條柴咁但係極度牙炸，路數又好！）

然後，似水流年歲月如歌，德國仔淪為二線弱雞，連德國fans界祖師爺阿叔，都拜拜你條尾．．．

今日，見到ｕ21班後生仔，終於唔再大腳吊，地面組織有板有眼，仲有幾件扭得兩咀添。雖然，第一場對西班牙之後愈踢愈唔對路，不過，唔再大腳吊已經令到我熱淚盈眶。

德國仔！呢次ｕ21只係熱身，2010世界杯，踢番場好波比大家睇！

09年6月21日（長沙灣）對 Robbie friends

出席: Rex, Mark, CEO, 冰, Marco, ss, 星, Amor, Karl, Robbie, Andy, Andrew
比數: 1 : 2
入球: robbie

長沙灣一向被譽為標準大場，無返咁上下人數都開唔倒波，加上烏隊球員出左名「鋤得多、無體力」，又再加上夏至既關係，有十幾位隊友到場已經算0係贏左一半，所以賽果輸一比二已經算係交足功課。如果上次 CEO 話 KG5 輸波係同個場有D關係--細，咁今次輸波亦都係同個場有關----大！！！（場邊球迷即時 "妖" 聲四起～～）

開波初段其實雙方互有攻守，阿 Karl 賽前應該未失身，所以做左是日0既 "處男"，好幾球波都比佢射到條柱 bong bong 聲，對方係都唔肯比佢入，Karl 下唔倒啖氣，走個陣仲係谷住谷住咁樣～

到左比賽中段，唔知有心定無意，開始有人九咁大腳踢個波出場邊，飛過晒 d 鐵絲網去老鍊咁遠，跟住大家就趁執波時間休息，真係辛苦晒執波既隊友。雖然休息左咁耐，但到開返波既時候，中場爭波明顯唔夠對手黎，部分隊友亦開始出現「有上無落」既情況，後防不斷受壓，好在俠盜羅賓遲左少少到場，卻及時為烏隊注入新動力，落場無耐就入返一球。另外亦要一讚替工龍門表現出色，屢救險球，最後烏隊只係失兩球咁多埋單..

整體表現：叻叻
開心指數：笑笑笑

09年6月7日（佐住五世）對 Matthew

出席: Rex, Mark, CEO, Dee, Javier, 冰, 超, 老朱, Marco, 阿肥
比數: 4 : 6
入球: Rex（1）、Javier（1）、CEO（2）

好多隊友一向麻麻地踢佐住五世，個場太細，又位處偏遠山區，性情中人阿超亦不禁講句 fxcking KG5，道出唔少隊友既心聲！唔知點解呢句咁平凡既粗口竟然響網上惹來政治爭拗，差ｄ未落場先開波！好彩得大佬輩 Mark 哥出手鎮壓，阿超最後更到場以示撐場，港大民意調查顯示，fxcking KG5 事件即時令烏合之眾各隊員既 "友情指數" 上升 10 個百分點，創回歸後既新高，有望今屆年尾 BBQ 會有隊員報名支持！

粗口想講就講、發生事勇於承擔、行動支持球隊，超哥，你真係我偶像！

今場波認真峰迴路轉，開賽冇耐已經連趙 4 粒，仲要粒粒好波！

第一球　士哥：Rex
十世冇波入既阿Rex，上場誓言要開齋，開波初段串演清道夫，引球出擊到前場三閘位起腳勁 band，直飛死角入網！呢球完全係阿 Rex 既 solo，亦終於比佢出倒火！

第二球　士哥：Javier
近幾場冰心訣控制脾四既 CEO，表現有番晒細路哥時代領軍既味道！又係帶波到三閘位怒射，皮球中橫楣彈出，Javier 執雞補中！除左 CEO 夠晒薑嘗試中距離遠射之外，Javier 反應快夠集中亦值得一讚！

第三球　士哥：CEO
可以話係今場既最佳入球！Rex 左閘位過一件帶到前場後橫傳冰人，冰人再即彈比今場 MVP 之選 CEO，CEO 撞射入網！過程清脆利落，難得響 BB 場都製造到咁美妙既組織！

第四球　士哥：CEO
（唔記得邊位隊友）角球地波開出，CEO 禁區內混亂中加一腳隊入左！入球後 CEO 猛話「符碌架咋～」小弟因為太遠睇唔清楚，想知道真相可留言 CEO 查詢。

領先四粒之後，烏隊愈踢愈走樣！小弟私底下分析，原因不外乎：
一、今場龍門老昭表現十個差！成場波慌失失，同 Mark 哥都竟然會產生誤會，更導致失第一粒！
二、欠缺 Robbie、Karl、Bag 攻擊鐵三角，前場創造力大減，扳平乏力！
三、最具爭議性一點，係大家都認為佐住五世太細，好難踢出平日既地面滲透，唯有採取英超大腳吊踢法，可惜好多隊友都唔太適應！要踢ｄ平時唔習慣既踢法，水準自然水銀地瀉！

其實今場大部份隊友都踢得唔錯，CEO 沉著應戰，Marco 頭鎚殺晒，超哥衝刺力強，冰人美妙二傳，老朱拚勁十足．．．更難得 chok 到烏合之眾 ver.1 經典球星阿肥出黎，簡直好似去左迪士尼見到麥兜咁神奇！雖然今場大比數領先下離奇輸突，但大佬 Mark 一句「唔緊要丫，咪當個經驗囉～」賽後亦冇出現互ｘ情況，輸波唔輸品，烏合之眾妖爸爹！！！！！！

整體表現：叻叻
開心指數：笑笑笑

09年5月31日（李鄭屋古墓）覆卓羅賓朋友

出席: Amor, Rex, Mark, Jacky, CEO, Dee, Robbie, 銳哥, 星, Javier, Karl, Bag, 冰, 超, 榮
Facebook 客串: 小Ken, Andrew
比數: 6 : 0 覆卓成功
入球: 冰（2）、Karl（4）

煮飯單位使出技術性餓波策略，大家果然中Q晒計，結果成條村到齊咁滯，連最難 chok 既隱藏球星榮少都 chok 埋出來！

上場地獄庄膽拖場邊爛腳慘敗，今場各隊員大打爭氣波，大車輪之下覆卓成功，CEO 更表示烏合之眾好耐未試過淨勝唔失球，醬仙咕 lee 咕 lee！

開波初段因為大佬 Mark 同 Rex 未落場，後防都係唔夠穩，多次比人放直線，其實我地波底都唔差，有跑得快既（例如阿牛），亦有傳得準既（例如 Bag、Amor、CEO 等）大家要學習下對手咁美妙既前場組織先得。

不過對手今場射門欠準，勁就勁不過梗係唔中龍，加上成場波烏隊使出血肉人城，對手射十球九球省中人，所以今場老昭無乜受到威脅，係臨完場撲出一球單刀，保住烏隊處子之身！

可惜我方把握能力始終都係唔穩定，控球時間雖然多但製造唔到射門機會，加上統計數字顯示識入波既隊友來來去去都係果幾件，結果雙方拉鋸左一段好長時間，搞到龍門後面不斷傳出熱好晒身既隊友媽聲四起「快ｘｄ入波換人啦！」、「係咪玩拉布呀？！」、「ｘ！再唔入波成隊換啊！」．．．而最得人驚既係，某心水清隊友指出就算成隊換都換唔晒！烏合之眾同香港政府一樣，養唔少人！

搞左好耐，換入阿牛後戰況立即改寫！阿牛不愧射球機器，落場無耐就打破悶局，Bag 過幾件交比走空既阿牛，阿牛即時撞射入網！過程清脆利落，可見 Bag 過關斬將能力同阿牛既射門觸覺！打開對手缺口之後成場波好踢好多，阿牛好快入整多粒，過程就唔記得啦～

跟住烏隊再換入另一金牌前鋒冰人，又係落場無耐唔記得邊位隊友（好似阿牛）地波橫傳冰人，冰人小禁區趨前一射，皮球應聲入網！能夠入到咁簡單唔使下下死扭數十件窄位怒射既波，證明前場組織能力得確有所改善！

之後冰人再響對方禁區頂接應傳球，好冷靜咁扣左兩腳先射死位，呢個波可以話係今場既金球！冰人果然係前鋒線上最冷靜既球員！

入到四粒，我方不禁掩住半邊咀來踢，Rex 更大聲話「我又要入波！」，再次落場後右路喪推怒射，又比佢射中條橫眉差ｄ得米！

可能因為對手「好波四眼君」未有到場，輸到四粒對手都覺得大勢已去，結果場場波好似飲左加料紅牛既阿牛，不斷喪追喪迫，搞到對手擺兩球老烏，最後淨勝六粒長雞完場！

至於 Jacky 溝返來既兩件 facebook 在野青年軍，貌似林一峰既 Ken 細細粒但係 mark 人痴得好緊，令對方轉唔到身，表現對辦，不過搶到個波之後比較急，無好好利用。另一位 Andrew，有ｄ患得患失，打後唔夠硬淨，希望下場能夠改善！

整體來講今場波前面踢得好過後面，尤其換下換下左右閘忽然起用兩件新仔，就算唔講技術默契都肯定有問題，以後換人盡量換番相同位置好ｄ！

今場波因為各隊友落場時間唔多，唔夠時間表現自己，今次只用電腦隨機挑選幾件隊友點評一下：

Amor 愈來愈穩定
Robbie 依然係成隊波活動範圍最廣既隊友
星 大師兄返晒來
Karl 積極性冇ｘ得頂
冰人 除左入球能力，「接應 + hold住 + 二傳」先係絕技
超 今場踢閘有ｄ浪費
榮 請會計部 check下佢幾耐無交會費

整體表現：叻叻叻
開心指數：笑笑笑笑

09年4月19日（李鄭屋古墓） 對羅賓朋友

出席: CEO, Dee, Robbie, 老朱, 銳哥
比數: 3 : 7
入球: 羅賓（2）、外援（1）

星爺、Jacky、Karl臨場失蹤，球會保留八號窗問斬權利。

地獄庄作賽，搵左幾件年輕人外援幫拖。雖然有兩件唔錯，可惜烏隊各員深感被放飛機，初段踢來個心有條刺，好快就失左3粒。其中除左外援質素問題，後防默契亦係致命傷。不過唔使太傷心，起碼我地用左反證法，證明左平時Mark哥、阿Rex、老昭三人真係好有默契！（Rex哥唔該飲多兩碗雞腳湯速速歸隊）

落後3球後，開始喚醒對勝利既渴望。憑銳哥多番助攻側擊，羅賓中前場舞龍咁舞，CEO同老昭傾掂數穩番條防線，加上今場唔頒MVP唔得既老朱，連追3粒，一度追成平手！

由於對方人腳始終比較平均，加上外援仔愈踢愈唔似樣，結果被對手3打1、4打1、單刀等等，狂失4球，最後大敗而回。

CEO
上半段其實踢得好好，有返當年風采，扭幾件清清脆脆，兩次飛鏟精彩絕倫，「年度最佳飛鏟」大熱！可惜佢成日口口聲聲話自己體力差，其實體力差唔係死罪，最大鑊係極端唔穩定既精神狀態！隊友一有失誤導致失球，即時發晦氣兼出口傷人。打擊士氣，比踢得唔好，差一千萬倍。體力唔好，咪換人囉，冇人換，咪要求休息囉，技術唔好，咪踢簡單ｄ囉，大不了咪輸囉！希望CEO努力克服呢個纏繞多年既風濕舊患，大家一定無條件等你康復！

老昭
自問今場守得唔錯，一兩野半單刀，兩球近柱必入（咁滯），失左7粒，幾乎全部都係非戰之罪。衰在烏鴉口同老朱晒命，話除左空晒或者金球先入到我，結果唔係空晒就係金球！不過我無怪隊友，就算擺到明玩失導致輸波，都唔係問題。我相信，冇人係想失波既，只係一場波冇話秒秒鐘咁冷靜，只要整體來講認真ｄ集中ｄ，其實失波唔一定同踢得好唔好成正比。

銳哥
側擊力強，多次邊線發動攻勢，粗身大細上上落落，無功都有勞！雖然仲有間唔中危險地帶玩野失波，但整體來講我覺得今場銳哥踢得好！咁先係我心目中既銳哥！如果有辦法令到體力可以有少少改善，咁就好囉．．．
老朱
地獄庄、落雨、濕地、無石，開波前我都貼到老朱今場又試鬼上身！果然，今場踢閘，雖然之後仲有公司比賽仍然毫不錫身！除左勇猛既頭鎚、睇空晒搓兩邊、清脆解圍、回身追到盡緊迫對手之外，最緊要係，老朱今場表現出強勁既鬥心！眼神充滿怒火，眉宇間唔洩氣！憑呢兩點，就可以睇得出佢係百年難得一見既踢後奇材！（阿Rex係祖師爺）老朱，不如你試下多ｄ踢後丫，比人扭過，唔夠人頂，解圍漏油．．．通通唔緊要，踢後同守龍都好簡單，唔ｘ怕死就得！

羅賓
烏隊靈魂人物！場場都保持高水準，就算有時要佢孤軍作戰，一樣交足功課有餘！今場都無咩特別野好講，早期小弟覺得羅賓比較個人化，近來佢愈來愈有大將風範，除左球技超班，勝不驕敗不餒既高尚情操，係大家學習既榜樣！個人穩重左，於是乎條士啤呔都泵脹左。

總結
有邊個唔想場場都人腳鼎盛，個個都狀態大勇！？但係當出現好似今場咁形勢比較惡劣既情況，更加係隊友們發揮小宇宙既時候！我開名都唔怕，雖然有時老朱會踢到走晒樣，銳哥會係咁玩失，CEO會發晒老皮，小弟會手軟腳軟，Jacky會臨場放飛機．．．其實都無乜所謂。小弟守龍多年，技術見人見智，但係次次落力打氣嗌ｘ到隔離街都聽到，都係為左keep住球隊既士氣！大家唔好太介意踢成點、贏定輸，踢出烏合之眾既風格，就係Mark哥所講既快樂足球，先至係大家幾廿歲又要返工又要湊仔，都仲會逢星期日希望個天唔落雨既原因！

註：今場士氣唔錯，冇互小，只係小弟忽然有感而發，缺席隊友無須掛心！

整體表現：兩個半叻
開心指數：兩個半笑

09年3月29日（李鄭屋古墓） 對獅子隊

出席: Kin, Jacky, Amor, Javier, Eric, Mark, Sing (末段傷出), Jim 僅熟 8 件
比數: 4 : 4
入球: Javier (兩球), Amor, Eric

特別鳴謝 Mark 哥今場約人之餘，仲不遺餘力咁幫手寫埋賽後報告，不愧為烏隊既典範，大家如果喜歡抒發一下賽後既情懷的話，不防試下舉手投稿寫返一 part 半 part 都無問題。

天公造美，烏隊要踢波，儘管之前一晚，甚至0個一朝早都仲係橫風橫雨，下晝雨都即刻停埋。烏隊及對手都不負天公之美，踢出一場既緊湊又好玩嘅足球。

相信由於臨近清明時節加上雨紛紛既關係，大家都各有各忙，距離原定開波既時間已經過左半個鐘頭，但係等極都係得 6 件到咗，攪到要搵對手幫拖先可以開到波，烏隊真係有 d 失禮。正正因為足球係一 team 人踢既，所以如果可以既話，大家可以盡量預鬆少少，早少少到就早少少開波，唔使令準時既球員餓波。

開波初段，烏隊雖然要借人先夠腳，但都佔上百份之 70 嘅控球指數，亦有入球機會，似是控制大局...

不過，足球賽事往往並唔係控球指數高就一定有波入嘅...係你入唔到波嘅情況下，往往就好易被對手轉個頭入波架啦...

首球 0:1 -> 對手超快球員亦貌似吳彥祖既 Daniel (好似係包辦 4 球)

0係 Sing Sing 與 Mark 兩位禮讓之下，被對手 Daniel 於大禁區邊搶到波單刀射入，呢一個咁美麗既誤會，令烏隊高據控球指數既情況下先失一粒。

1:1 - Javier

0係上幾場賽事都因為要飛去外國治療傷患而缺席嘅 Javier，餓波已一段時間，傷瘉復出後狀態竟然急升，0係小禁區扭過對方一名後衛後單刀射入，為烏隊打了一支強心針。

2:1 - Eric
3:1 - Amor

跟住落黎烏隊連入兩球，CEO 話好似每一球都關 Eric 既事。無疑，Eric 確係烏隊既動力，佢今場做倒一貫既進攻之餘，要特別一讚既係0係中圈位置亦防守得非常好，經常能夠攔截倒對手既攻勢。事實上，球場既中圈範圍0係戰略上就好似蜀山一樣，係兵家必爭之地，Eric 今場穩佔中圈位置，令烏隊唔會好似以前咁「前有前踢，後有後踢」。Amor 入0個一球係交到佢個位完全空晒，佢亦不負所託射到　ban ban 聲，事後佢話 "幾驚打飛機啊" <- 咁正直既人真係世間少有。

3:2 - Daniel
3:3 - Daniel

烏隊既另一特色係往往0係領先既狀態就會軟返，今場亦唔例外。無可否認，對手的確係 "近"，Daniel　靚仔之餘，佢既短速同佢大步推波既技巧令烏隊既後防頭都大埋，再加上 Martin, Vincent 等倒戈，輸返兩球都算係不幸中既大幸。

4:3 - Javier

Javier 再入一球，可以話係整場賽事既 "支" 點。這邊廂烏隊士氣高漲，另一邊廂對手亦不時傳出 "踢好 d" "追返" 等吶喊。

4:4 - Daniel

未幾，Daniel 再次突破烏隊既漏洞逼和。呢個 moment，其實法定時間已經過左，但係大家都話要踢多最後一球決勝負。雙方球員0係補時階段都搏到盡，踢左 15 分鐘左右，Javier 終於老抽，其他球員亦多數變晒紫色，呢場咁精彩既賽事先至告一段落。

．．．

獅子隊，後會有期！

09年3月22日（李鄭屋遊樂場） 對羅賓之友

出席：Mark + 老昭 + 老朱 + 羅賓 + Karl + Eric + CEO + 功夫良 + 摩 + 星 + Rex + 銳

比數：5 : 5 迫和　或　6 : 5 反勝
入球：Karl(2)、Eric(1)、星(1)、對方烏龍(1)、CEO(1)

一場將會寫入史書、經典既賽事．．．

開波冇耐，猛將 Rex 已經傷出，加上 Mark 未趕到，後防冇左兩名主力，默契即時受到考驗。事實上，除左個人技術外，打後默契更加緊要，結果好快就被對手連入 4 粒！對手多次r放直線單刀，又確係值得我地學習。輸到4蛋，觀眾席既阿叔一早就 meet 飛走人！點知，奇蹟就係呢個時候發生．．．

換入近況大勇既羅賓後，中場即刻活躍起黎。羅賓扭得又傳得，成功破壞對方既防守，開始比番ｄ壓力對手。亦係憑住羅賓鬼鼠開地波角球，迫到對手擺烏龍，首先追回一粒。

但係我方仍然輸緊 1:4，加上對手唔弱，要追都唔係想像中咁容易。但係烏合之眾係一班唔會咁易放棄既靚仔球員！Mark 哥趕到，首先穩定番之前踢得頗亂既後防。而今場收起平日火爆既情緒，沉著應戰既偉大球員 CEO，更一改以往技術型踢法，同對方鬥衝鬥撞！估唔到身形唔算大份既 CEO，可以踢呢 ｄ 波，證明鬥志最重要！努力係會得到回報既，CEO 右路底線力壓對手搶球，再憑感覺撩個波向龍門，竟然比佢零角度笠入左！呢個入球，完全係用鬥志同拚勁換番黎既！可惜對手上訴 CEO 犯規在先，我方唯有懶有風度咁接受炸糊裁判。

食左球炸糊，並未打擊我方志氣，平日低調善良既星爺，忍唔住要做ｄ野！右路帶帶下，失驚無神 band 左球世界球！呢個金球再次令我方志氣大增！除左靚絕之外，十世唔入波既阿星都用行動表示「我地仲未輸！」，令到我都忍唔住流左半滴男兒熱淚！烏合之眾，奸爸爹！！

除左羅賓不斷舖橋搭路，另一位 U21 球員 Eric，今場亦踢到鬼上身！有球波羅賓過兩件後後腳交比佢，佢即時撞射，個球又恆角度又靚，可惜咁都被龍門飛出！而佢多次嘗試中距離 chok 死角，可見佢同 Karl 果種力量+速度既不同威力。Eric 幾經 good try，終於有球中前場右路推入中路，左腳彎入一球死角世界波！靚波指數比美阿星既遠程炮！

當比數追到 3:4，隊友們腦充血咁滯既時候，烏隊再次受到心理考驗！一時後防大意，被對手又整入一粒，對手射出一球有老撻之嫌既怪西地波，收死老昭！又被對手拉開比數，烏隊點算？

方法好簡單，就係更加積極唔放棄！本來只係諗住到場搵朋友去街既Karl，睇到咁既局面，都忍唔住要換件波衫落場。射球機械果然有料到，落場冇耐就先左路射近柱得手，4:5。最後羅賓再次施展扭波絕技，連過數件後美妙直線交比 Karl，Karl 追到底龍門出迎前撞入，烏隊創出奇蹟，5:5 收場。

有待改善之處：
左右閘引球出擊時，似乎太多交比底線隊友，隊友背住龍門被兩個後衛夾擊，好難做到乜野，以後可以嘗試睇定ｄ先，多ｄ做入中路，拉空位置會好踢ｄ。

球員特寫：

Mark
不愧後防大佬，始終都要靠佢先可以穩住條防線。如果數一場波掂幾多腳，Mark哥可能係成隊波掂波次數最少果個，但佢勁就勁在唔使掂波既情況下都可以帶動到球隊！有效率、實際、睇通球賽。今場可能比較上頭，不斷指喝:P銳哥，冇問題既，大家都係為隊波姐。

銳
今場踢得有ｄ十五十六，可能因為要經常助攻，體力消耗較多，表現未如平時咁搶鏡。防守時個位置間唔中出現漏洞，銳哥其實可以多ｄ叫隊友幫拖，唔使下下一個降兩個。

老昭
唔太滿意自己表現，但就好欣賞隊友高度集中精神。體能同技術，始終會年華老去，所以更加要有鬥心同意識。

老朱
狀態非常飄忽既球員。今場有少許滑落，亦經常出現夾硬推既情況。有球佢第一時間撞射，被對手踢中，睇個勢應該好痛下。老朱，唔使次次超水準架，穩定ｄ就得架啦！

羅賓
雖然今場冇入波，但表現一樣光芒四射！扭幾件後交靚波，對手一定激ｘ到爆血管。小弟愈來愈欣賞羅賓響中場串連前後場既真功夫！

Eric
Eric係一位用腦踢波既球員，幾下嘗試 chok 角充分表現出佢夠薑又冷靜！唯一輕輕扣分係今場略嫌hold得太耐。點都好，Eric 係一位美貌與智慧並重既好隊友！

Karl
烏隊入球希望！場場有波入，唔係野小！除左本身射術同速度之外，能夠不斷數糊係因為Karl鬥志驚人，追到盡、唔鍚身，大家應該好好學習Karl呢份精神！

CEO
調節好鬥心同情緒既 CEO，發揮出驚人力量！講對球隊既貢獻，CEO 永遠都係第一位！所以我好明白有時佢會著燈發老脾，完全因為佢對隊球真係 120% 投入！今場射入惹來爭議既一球，count 唔 count 唔重要，話比對手聽「無咁易！」果下先無ｘ得頂！我期待CEO自己諗辦法重拾當年舊博扶林既領軍能力，如果只能比我揀依靠一位球員，我一定揀你！

功夫良
經典球員終於重現！由「烏I」年代開始，功夫良就已經係不可或缺既重心球員。機動力全隊之冠，各方面既才華都相當平均，樣樣皆能。近年因為湊仔，暫時不復當年勇，不過各路對手唔使開心住，功良良返生之日，就係烏合之眾稱王稱霸之時！

摩
自從阿摩冇黎一排，唔知係咪晚晚上下沙特訓，回歸後表現更勝從前！打閘，防守時路數好，成場波都冇出現過甩漏情況；助攻時又睇通隊友位置。技巧型隊員，比ｄ波好「毒」到。我覺得阿摩係另一位非常適合打閘、上上落落既隊友。

星
星爺！You are amazing！近幾場開始回復最高水準既阿星，除左恐怖既攔截力、準繩既清波，今餐更加射入世界波！入球後，我地低調既星爺，個樣好似唔關佢事咁，女fans見到仲唔高潮迭起！老朱話星爺對上一次出現呢個「唔關佢事」既表情，係結婚果日．．．事後星爺叫我記得寫佢入波，我點只寫，為左紀念呢球世界波，我直情要畫埋出黎啦～（insert圖）

Rex
開賽冇耐就因傷退下火線，造成初段失成4粒既原因。大家可能唔清楚，Rex一直以來幫小弟瓦解過唔少埋門威脅！大佬，你好快ｄ去睇跌打，我冇你唔掂！！

今場波踢完有相當多感觸。功夫良終於重出江湖、Mark 哥犧牲另一場波既半場趕到助陣、CEO沉著應戰身先士卒、老朱夠雷夠電放棄放飛機、Karl 淨番 5 分鐘都落場搏到盡、金球一粒又一粒、球隊既集中力係近年來最好一場、烏隊對住勁旅都可以迫和（或反勝）、阿星又車我返屋企．．．

咩叫一隊好球隊？今場波烏合之眾不論場內場外，完美咁演繹左出黎。

我以身為烏合之眾一員為榮！

整體表現：叻爆廠
開心指數：笑爆燈

09年3月8日（李鄭屋古墓）對朱朋好友

鳴謝：Mark 哥同老朱自己唔到都為頭家安排好晒
出席：老昭 + 冰人 + 羅賓 + Karl + Eric + Jacky + 摩 + Rex + 星
比數：4:3

入球印象：

1. 羅賓：某隊友斜傳地波，羅賓撞入
2. 羅賓：過程唔記得
3. Karl：羅賓一個扭九個之後交比 Karl，Karl 落場掂第一腳就入波
4. Karl：Jacky 開角球，見 Karl 攝倒前柱，地波送出阿 Karl 門前撞入

咁多位大佬，小弟因為成日企到好近個電視，又 24 小時上網，近視愈來愈深，基本上睇唔係幾到前場發生咩事，加上老人痴呆，真係唔記得 d 波點入，希望咁多位大佬唔好介意，最好就邊個入波自己留番個 comment，唔使客氣，等大家分享下。之前幾場都係踢夜波，好耐都冇見過太陽伯伯。今場雖然老朱同 Jacky’s friends x 2 臨時飛機，CEO 又要照顧愛妻等，都依然有成 9 件到場，各位工友熱誠度返回八十年代香港最風光既日子，餐餐魚翅撈飯！

今場對手平均件頭都幾係，加上踢法頗勇悍，烏隊可以話遇到志同道合既波友。Jacky 賽後評述，話「人地有人地狼，我地有我地狠」，可謂一語道破。雙方都時有過勇表現，好彩最終冇演變成流血事件，起碼證明烏隊既 Rex 同 Jacky 好克制。

賽事流程：

我淨係記得近幾場羅賓、Karl、Eric 三人回歸後幾乎包辦晒所有入球，而且球球都好靚仔下，的確係烏合之眾純正血統。一開波雙方都係搓住先，對方平均大份加上腳下功夫唔差，我方踢得幾下風，不過雙方都冇乜起腳機會，換入羅賓後，冇幾耐佢就率先趙入一粒。點知好快對方就省中人改變方向扳平。

之後近來表現大勇既羅賓回敬一球再度領先，可惜今場表現麻麻既老昭，死球開出交左比人地，被對手再度扳平。

後來入波既次序唔係好記得，應該係我方 lead 住。惹火尤物 Karl 被對方三番四次做低，一個唔覺意整花塊面就唔使搵食囉（溝唔到女係唔受保既）。臨尾 Rex 亦不甘示弱用行動證明烏隊都識踢呢 d 波，剷令對方飛起再跌落地打三個筋斗，say sorry 後順利割禾青小勝 1 粒。

個別球員：

• 老昭除第二粒咩晒飛之外，第三粒如果狀態好 d 應該都救到。今場表現水準以下。
• 烏隊既「草蜢」（羅賓+Karl+Eric）具入球能力，冰人踢得冇咁辛苦，亦可表演一下其他才藝，有球佢響角球旗 hold 住個波成粒鐘，幾條友圍住佢搶極都搶唔到，認真神乎奇技，而佢「響中前場控定回傳後上隊友」呢招指數達 98！
• 羅賓表現愈來愈有大將之風，講真，之前佢比較上腳，單打獨鬥比較多，近來佢除左扭九個之外，亦會配合前後場球員既工作，比起從前「一打九」，依家佢「一 lead 九」更有睇頭！
• 如果我係對手，我最唔想對 Karl！小型球佢果種衝刺力好得人驚！一腳就過你，下一腳就射，基本上好ｘ難守，亦逼到對手好 x 容易犯規，係小弟心目中最勁既前鋒巴迪斯圖達既踢法，今場佢除左省入兩粒，亦有球右邊小窄下狂抽中眉，到依家條柱仲震緊。
• 最唔想對 Karl，但我最想同 Eric 做隊友，以 winning 黎講，佢既「team work」應該都有95 以上，表現未必好似羅賓、Karl 咁搶鏡，但係響中場做左唔少搶截工作。
• Mark 哥缺席，Jacky 客串演掃垃圾。今場佢表現可以話光芒四射，除羅賓之外 MVP 之選！Mark 哥頭鎚好 d，Jacky 轉身就靈活d。殺波乾淨之餘，清道夫更講求領導能力同分波技巧，Jacky 分波持續上揚，long pass 指數係咁加係咁加！
• 阿摩近來較少出席，但每次落場都比到人驚喜！我覺得阿摩踢法其實好ｘ古惑，好似 d 阿叔咁，唔使點埋身但係又好鬼毒。今場佢踢閘，防守穩鎮，亦頻頻助攻，多次落底傳中，製造埋門機會，交波準得黎唔難控。多 d 黎丫老細！
• 以前都講過地上最強既 Rex，後防一夫當關，防守力比 Mark 哥更勝一籌！我諗我可能間唔中都可以過到 Mark 哥，但一世都唔會過得到 Rex！如果成日淨係話佢身位好、夠搏，唔係太公平，我作為龍門睇得清楚 d，Rex 其實 "部" 個位好好，好多時候對方一推佢已經攝左個位，好少要回身追。今場臨尾回馬槍即刻出事（人地）。
• 曾幾何時，星君係我心目中攔截力 99 既球員，前排佢唔知係咪有心事，踢來患得患失，最近佢又試全面復甦，攔截力更提昇至 99.99！難得佢內心燃燒但依然有一顆赤子之心，笑笑口作出勇猛截擊，係一位十分值得信賴既朋友號。

今場對手有料到，烏隊亦唔弱，高手過招，人生一大快事！

整體表現：叻 叻 叻 叻

開心指數：笑 笑 笑 笑

09年2月28日（佐住五世）翻撻 Herman Tam Louis the Friend

出席：Mark + 老昭 + 老朱 + 冰人 + 羅賓 + Karl + Eric + CEO + Eddie(Mark友)
比數：7:1 大炒
入球：Ken (1)、Karl(2)、羅賓(3)、Eric(1)

《烏台之眾 Rap Song》

今場波你問踢成點　伍晃榮要講明先
近視老花兼斷片　入成七粒真係記唔掂
大腳吊while開波初段　簡單直接踢住先
烏合之眾陳賤賤　今場終於可以踢前
Jacky對準拂個波去另一面　賤賤禁區同人鬥搶點
跳頂想用頭鎚扇　對方後衛竟然出老千
CEO都"廊"真係唔x比面　點知咁樣反而入波先
火牛直指對手唔檢點　嚇到對手想走先
仲以為場波要腰斬　呢鑊真係要claim返車錢
好在　對方傾完一大爛餐　叫做有d進展
肯繼續踢落去但要斯文一點

U21軍三位青少年　掛住ｘ女好耐冇見
今場賽事終於出現　三位隊員踢到發晒癲
包辦七球上晒電　一班元老認真冇面
羅賓踢法好ｘ刁鑽　射入三球理所當然
Eric扭波成隊最ｘ堅　一個扭散人地對面
火牛直頭踢晒條右邊　喪推怒射好似一支箭

後防大佬我地既Mark哥　負責包後殺晒高波
帶埋朋友Eddie同慶賀　橫練身型好鬼科
Jacky踢得都唔錯　橫傳直線準左好多
冰人雖然冇入波　控球能力都冇生疏
最奇怪係老朱哥　上場人少踢得好過人多
昭強初段失左一球波　其餘時間人客稀疏

總結下今場賽事　U21助陣踢得比較容易
入波唔係最緊要既事　開開心心先至有意思

整體表現：叻 叻 叻 叻
開心指數：笑 笑 笑 笑 笑

09年2月15日 9 pm - 11 pm（佐住五世）對Herman Tam Louis the Friend

出席：Mark + 老昭 + 老朱 + 冰人 + Javier + Rex + 銳 ＝ 7件僅熟
比數：1:2 = 力戰而敗

整體

半夜 9 點西環偏遠山區開波，竟然最後都踢得成，各隊友精神可嘉！建議今場出席球員可獲終生免年費！

今場地庄作賽，7兜友踢來虎虎有威，冇入場既球迷走晒寶！由於對手後備都多過我地正選，年輕力壯，加上採用全場壓迫踢法，烏隊唯有一改以往戰術，大踢英超波高Q大棍！龍門老昭一場波開大腳既次數，差唔多等於 07＋08 年總和！雖然對手控球指數接近 70%，攻防戰下唔知點解我方士氣好x高昂，隊友們愈踢愈硬，唔錯咁守左一場球賽！一開波對手已派遣兩名前鋒局我地，初段嘗試一貫左右閘做上去，但因為對手迫得太緊效果麻麻，及後上下院一致裁定大腳忽，減輕後防壓力，同時比番d壓力對手。

（以下內容由老朱提供，特此鳴謝，歡迎各隊員供稿！）
今場唔知點解，大家都好好力之餘，後防仲好多引球出擊，尤以 Rex 最積極，撞散兩件交直線，追唔到都要俾隻指公佢。仲試過係對方禁區頂同 Mark 哥爭波踢。另 Mark 哥近場尾段好鍾意上前助攻，令前場有人滿之患，呢兩條友係咪想同我（編按：老朱）爭位踢。Javier 係中場唔只落力，仲破壞對方好多攻勢，好有星星當年影子，令後防班友好得閒，唔該幫忙查下流灘，保住小弟（編按：唔知係指邊個？）位置。我隊又多一員猛將，烏隊上市重現希望，建議得閒落 bar 集訓，進一步提高士氣！

第一球

由於我方 3 名後衛 Mark、Rex 及銳哥有出色表現，Mark 哥例牌好路數負責掃垃圾，左右閘 Rex及銳哥更有如鬼上身，x屎忽功夫好得人驚，加上夜盲症龍門老昭力挽狂瀾，令到對手雖然進攻次數多但每每無功而返！對手遲遲入唔到波，踢得愈來愈急，竟然同我地鬥大腳！所失第一球就係對面龍門開大腳，老昭慘被笠死先失一粒。

第二球

而沉睡多年既老朱，又名 "劉 the"，別名 "方東信"，外號 "馬德東"，今場更可謂踢出代表作！不斷同大隻後衛埋身肉搏，更不下數十次頭鎚二傳，雖然唔係話下下都 set 到位，但拚搏精神值得請佢飲杯餐茶！（凍飲自己加兩蚊）佢亦射入精彩一球，一度追成平手！老昭大腳上前，對方後衛控低但甩甩地，老朱唔該無聲近鵝眉月射地波左下角入網！

之後有球波，事後據老朱單方面作供，話烏隊中前場搞左一輪，落到阿銳腳下，阿銳斬比老朱，老朱再頂入禁區，冰人門前單對單跳頂高出！老朱猛話唔跳可能反而入左，但係作為前鋒搶前跳頂係本能反應黎既～可能老朱球場上從來都冇「本能反應」呢個包袱．．．可惜未能反超前，但證明烏隊已經爭取番唔少攻勢！

互有攻守下今場 MVP 老朱終於忍唔偷偷兩個掣一齊禁──出‧絕‧招！左邊邊線附近「笠抖」！！絕招果然係絕招，雖然扣油但都叫做中眉彈出，可惜～

第三球

之後有段時間，唔知點解烏隊後防忽然間走散左（呢樣野冇得解釋既），結果被對手地波cut入禁區撞射得手，攻入致勝一球。

臨完場有球烏隊中前場搓左好多腳，製造出成場波最精彩既組織，再由阿銳左路近底斬比遠柱老朱，可惜高左少少頂唔到。球証吹雞，地庄下僅負 1:2。

個別得分

老昭
能見度0.03％令到聽覺同嗅覺特別靈敏，不過同踢波唔關事。撲出一記地波及幾次單刀，其中有球單刀，問心講係撲人多過撲波。事後隊友力撐話「冇foul冇foul」、「邊度搵個球證黎吹呀～」、「最多黃牌」．．．烏合之眾果然係包贓枉法！

Mark
中環甲級清道夫，包波準繩，比對手力壓下依然十分淡定，其實佢因為比較高大靚仔、孝順顧家，講真轉身同靈活性一定冇矮細樣衰球員好，但係好路數加上踢法簡單，一般前鋒都幾難過得到佢！以前覺得佢似泰利，依家覺得似巴里斯多d。

銳哥
可能本身技術有番咁上下，比較鍾意上腳，初段踢法略為冒險，結果幾次被對手迫甩製造驚險場面，後來踢番簡單d，穩穩鎮鎮。特別澄清一點，唔係話下下都要咁踢，只係應因唔同對手唔同陣容。不過單單講防守力同落力程度，都冇咩好挑剔。建議日後可多d回番比龍門。

Rex
再次表現身價！絕技係失驚無神又過一件！踢法硬朗，尤其搶截同破壞力全隊之冠，比美當年阿星全盛時期！雖然亦有 hold 得太耐而被對手迫甩，但係龍門老昭表示因為佢平時有做零存整付，有「獲准失誤 200 次」既基金 backup 住。雖然今場有球波玩失左被扣1球，但後來又勇救番 1球，所以賽後依然維持住 200 球既零息存款。

Javier
請大家記住，佢個名叫「哈~fee~呀~」，係一個西班牙名，連佢個朋友 Mark 哥都叫錯晒！就係呢位球員率先力主大腳吊。今場踢中，非常落力，奮不顧身，相信佢前世已經註定今生要成為烏合之眾一員！

冰人
最大既優點係冷靜，今場亦好努力咁不斷製造機會。英超踢法，前鋒冰人及老朱雖然難踢好多又嘥油，但冰人依然表現出往日風采，多次被圍困下睇通回轉，可見佢控球能力真係非常高，始終冰人既腳下功夫先至係佢強項！

老朱
踢得好唔好都係其次，淨係拚搏精神都爆燈！下下唔錫身同對手火星撞地球，d鬚根一路踢一路生，男人味番晒黎！事後佢解釋因為開波前同老昭打機過左重要一排，令佢士氣大增！老朱可以列印呢篇賽後報告，到 CEO 屋企換領「啜x咀」一次，詳情請向 CEO 查詢。

總結一句，今場士氣唔錯，加上開開心心冇乜壓力，可能因為咁踢出超水準！對手亦係一支好球隊！

整體表現：叻 叻 叻 叻
開心指數：笑 笑 笑 笑

09年1月28日 大年初三（草馬地仿真草）對香港高官

出席：阿Sing, Jacky, CEO, Mark, 阿占, Dee, 老朱, 冰人
比數：3:1

牛年賀歲杯，賽前竟然有人出口術暗示放水，十分唔老泥，一度引起公眾不安！不過為怕新正頭斗唔到某人封利是，其實大家心裡有數。當烏隊被對手射入一球時，各隊員面露曖昧笑容，諗緊乜大家心照！

今場 MVP 非冰人莫屬！大演帽子戲法！牛年重拾射門鞋，重現當年過關飛傳奇，烏隊今年肯定有運行！而且三球波頭頂腳踢，充分表現出冰人既射術相當全面，射門技巧加 5 個 point！

• 第一粒:某隊友左路近禁區角橫傳右路冰人，冰人控定抽射入網
• 第二粒:某隊友右路落底地波傳中，冰人標前趁龍門出迎時乖巧地輕 chip 入網
• 第三粒:中前場精彩搓左一輪，落到右路近底 Mark 哥，long pass 有 98 既 Mark 哥睇到定斬比冰人，冰人靚絕頭鎚入網

特別一提，對方門將好鬼神勇，否則烏隊可以省多幾粒唔出奇。

阿占確係後防重要人物，有佢踢閘，守得穩之餘，邊線助攻力大大加強！占兄有腳頭，建議日後可多起腳！Good try，我地呀吓，我地呀吓！

最令人喜出望外係阿 Sing 師傅返晒黎！成場波非常穩定，少左前一排因為拖泥帶水而帶來既無謂失誤！尤其有段時間佢踢啦士非常清脆，值得一讚再讚，讚完又讚！（Sing 哥比左利是我未？）

老朱今場都踢得唔錯，同隊友多次短傳組織攻勢，減少夾硬亂推，效果更佳！

CEO 同 Mark 哥保持一貫實力，尤其對手比較弱，烏隊談笑用兵既時候踢得特別精神爽利，能夠發揮快樂足球既威力！

Jacky 因為利益衝突，今場波就唔特別評論喇！

總括來講，暫時烏隊踢順境波係比較好，一來 lead 住來踢壓力小 d，二來唔會因為亂發皮四擾亂軍心。不過咁係唔足夠既，一隊波應該順境時踢得瀟灑，逆境時冷靜沉著應戰，咁先係一隊有球味既好球隊！事實上當體能、技術、力量等等指數不斷下降既時候，心理質素更應該有所提升！希望牛年大家和和氣氣，每次踢得開開心心，為本地球壇輸入正能量，福有油雞！

09年1月18日（King George 5）對 Matthew

出席：阿Sing, Martin, Jacky, 阿超, 阿冰, 阿康（冰 cousin）, 軼名（阿康 friend）

今場波差 d 踢唔成，阿超話聽倒 King George 5 都有 d 驚，因為路途比較遙遠，在佢黎講係對《烏合之眾》忠誠度既一個考驗，最終佢都準時赴約，又一次証明《烏合之眾》唔係一盤散沙！！！！ >:<

Mark 哥雖然黎唔倒，但一早已經打電話斟定對手借人，對家亦非常有雷，竟然過件好野比我地，《烏》隊第一個入球就係由呢位 11 號既借將見功。

比賽初段，對方採取港式既踢法，充分體現 901 戰術既智慧，《烏》隊後防未有受到考驗，反觀進攻方面就遇到唔少既障礙，好多攻勢都擊破唔倒密集既人群（包括自己友）。其中一球由冰人跳頂中橫眉，再由阿康飛身抽射，可惜 "Bon"~~~ 一聲，省中走避不及既冰人。跟住另外有一球阿康勁射，又係省中唐大佬阿冰，未知佢地兩兄弟係唔係有 d 積怨。

另外兩個《烏》隊既入球可以話係 Martin（同阿冰）既代表作。第一球由 Martin 落底線，然後出個地波比龍門口既阿冰射入，相信《烏》隊好耐都無試過有咁簡單．直接既底線傳中。第二球波好次係由阿超中場橫傳右路，然後落到阿冰腳下，阿冰一漏之下個波去左 Martin 個度，新加盟既 Martin 又使出佢落底線既板斧，今次仲自己射埋。事後隊友質疑阿冰"羅"唔倒個波先會漏，但冰人話係特登漏比 Martin，更大聲疾呼：「d 波梗係咁踢袈啦！」 :p

其餘隊友阿Sing, 阿超, 阿康同埋佢個位貌似小肥既 friend 都表現落力，小肥更一個扭幾個，最後禁區內比對手用腳整低，對方一句話「我都無用手」便不了了之　?_?

由於是日《烏》隊後衛一個都無出席，我地入三粒之餘亦比人入返五粒，其中一球係 jacky OWN GOAL！jacky 表現較差勁，除左係屎波之外，其中一個原因係要一路踢，仲要一路記住 d 人名，又要留意各人表現，同埋心裡面數住幾比幾，最後先寫倒呢個 report 交功課比阿 dee 同埋錯過左賽士既其他隊友們！今日呢場都算係快樂既足球，值得同大家分享．．．

08年12月28日（深水步楓樹街）對 Patrict

出席：Mark、Karl、冰、摩、鍵、Dee、銳、Rex、Javier（Mark fans）、Thomas（Mark fans）
比數：4比2入球：Karl（2）、冰（2）

《球迷世界》停播十九幾年後，2009年前再次同觀眾見面，希望來年可以振興本地球市，刺激更多球迷入場！

"手直"龍門老昭

久休復出，喜見球隊狀態唔錯，各隊友踢來有心有力，一d都唔似已年屆三張幾，皮質醇愈來愈高既中坑！老昭久疏戰陣，表現未如理想，不過好享受再次同大家足球同樂！年事已高，加上眼花花，完全唔記得頭三球點入！

後防特稿：阿銳 + Rex + Mark

今場對手壓迫性唔算高，令我方可以睇到定慢慢搓，加上後防有分波無x得頂既阿銳，同失驚無神又過一件既Rex，令到平時只會作棄權狀先至盲目助攻既Mark哥，竟然有超過半數時間上到前場！不過其他隊友未有補佢位，令今場多左比人半單刀及起腳。而我方把握能力始終太唔穩定，希望09年可以有所提升！

小弟一向熱愛古典西德踢法，崇尚控球在腳，偏好由後場開始慢慢搓上去，所以左右閘既控球同助攻能力相當重要，而啦士就負責策動既角色。今場波小弟十分欣賞好有耐性既踢法，去唔到就搓返中後場再做過，hold住個波先，亦可以運用到球場闊度，值得一讚！

中場幫波方面略為不足，有段時間前後場斷開左，呢方面需要作出改善！

自從鍵鍵唔知響邊度搵返失散多年既同學銳哥加盟，銳哥踢閘位相當稱職，真係估佢唔到粗身大細竟然咁x好波！放d長傳又準又好控，烏合之眾long pass指數有98既除左Mark哥後又添一員，正！

至於Rex，因為夠硬淨，本來小弟覺得佢比較適合啦士，負責包抄及救龍門一命，估唔到呢位仁兄原來過波都有一手．加上體能唔錯，比起阿銳更加可以經常帶波上前，希望Rex兄傳送方面可以更進一步，及嘗試同隊友多做one two，咁就perfect！

Mark哥一如以往表現穩定，技術高之餘，更加可以穩定軍心，有佢大家都定好多！佢既簡單直接踢法，先至係小弟心目中最高境界！Mark哥同當年既功夫良同學，係小弟心目中機動力最強既隊員！今場多左助攻，令進攻模式多左變化，如無記錯更加有黃金機會，可惜把握唔到，否則可即時獲預繳十年會費既優待！

個別球員表現：

阿摩今場可能受場地濕滑影響，少左上腳，整體雖然無乜驚人表現，亦未見失誤，講到尾，其實所謂「強隊」，正正係大家表現平均，團結一致，根本唔需要球王！

阿Karl果然係入波保證，喪推+重炮收死唔少對手，今場埋齋一球世界波，playback睇返當時某隊友前場禁區頂左路睇通，橫傳右路近禁區角既Karl，Karl即時撞射，皮球直近柱死角入網，靚波指數爆燈，加上人又靚仔，唔怪得佢既facebook有咁多女...

至於另一位梅開二度既前鋒殺手冰人，小弟一直非常欣賞佢除左入波之外既二傳能力！好多時佢單前鋒本來好難踢，但係比對手圍困底下都可以hold住個波再回比後上隊友，呢下功夫唔講得小！自從烏隊增添Karl、Eric、Robbie等U21新力軍，入波既重擔唔再全部落響冰人身上，我覺得反而更加發揮到冰人其他方面既才華！

鍵鍵係烏隊最全面既球員，前中後龍無一不精，亦因為咁搞到佢從來都無固定位置，難得佢一樣表現優異！小弟覺得佢係一位always ready既球員！我始終認為鍵鍵係踢中中既不二之選，希望將來可以發掘更多既後衛，比鍵鍵上前d！

Mark哥既兩位fans，紅白間君波底唔錯，更加有烏隊欠缺既制空能力，唔該Mark哥用d手段引誘佢加入，例如自動升級白金會員！另一位黑衣人亦拚勁十足，可以考慮免收06-08年會費！

小插曲：

向來勇猛既Karl同Rex因為稍為過火同對方發生少少爭執，鍵鍵本住息事寧人作出勸籲，言語間有誤會，希望各位隊友多多包容，正所謂無怨不成父子，無x不成隊友，期待09年烏合之眾愈x愈旺，大殺三方！

特別一提，請Rex兄繼續保持一貫勇者無懼既精神，只需要事後扮下野安撫一下倒地作痛苦狀既對手便可...

05年9月4日（阻住五世 ）Edward

【陳情表】

上仗佐治五世對「暗渡陳倉」隊
本營大意失荊州
慘敗於敵軍手上
末將回家苦思良久
發現最大漏洞
乃中場線攔截能力不足
乎此重鎮向由小岑君或阿星君鎮守
阿星君勇猛如天將下凡所向披靡
小岑君亂世之驍悍奸雄粗中有細
二人皆有一夫當關之大能
實乃曠世之才
我軍縱有無敵先鋒如冰人君及阿亮君
防禦力舉世無雙之阿Mark君
智力及創造力超凡入聖之軍師鍵鍵君
然中場欠岑星二人
致使未竟其功
故
末將願仿傚古人之遺風
三顧灣畔
請神人出山
替天行道也

來仗無論敵軍何
盡皆先除而後快之死而後已

05年6月19日（修地 ）Edward

比數：七個一皮（破蛋人：冰人）
出席：
1. 鍵鍵
2. 阿Sir
3. 老昭
4. Andy
5. 阿星
6. 肥休
7. 阿冰
8. 阿Rex
9. 林家亮
10. 劉輝
11. 阿蛇

《烏合之眾》光榮時刻，一d全部波衫都著過晒。搞到大家唔夠波衫著，其實有幾個原因：

• 証明我地《烏》III人強馬壯，終於上位
• 所收返黎既會費根本無用黎買波衫，大家都比人呃左！
• 有臥龍…虎既球員畏罪自首，承認偷波衫，我地已經打左佢 pat pat 喇

根據【新陳鍵量子力學理論】＝ 波衫使用量　反映　烏合之眾上位指數　而 上位指數 ＝ （球員數目 x 熱誠度 ）÷ 交叉互片
由以上算式，可推論出 ．．．　就黎又要夾錢買波衫

講返場波，輸到７粒咁肉酸，假如係《烏合之眾》II或之前既版本，肯定又係大炒一鑊跟住散band先安樂。不過今時唔同往日，《烏》III完美版之所以稱為完美版，皆因刪除左「羞恥之心」呢個指令，取而代之係「無恥之心」。初步觀察效果良好。

事實上，幾件死唔去既烏合之眾開國元老，一致認為依家隊波，比起以往任何一個version都強。強唔係話成九日贏、超很勁果隻，而係無論隊型、攻防人腳、平均技術、出席率、開心指數等，都比起以前好得多。 以今場波為例，輸到７粒，但絕唔係一面倒賽事，伍晃榮覺得，控球時間唔差得太遠，我方亦有埋門機會。不過對方前鋒把握性強，高速又射得，所以大量失波無話可說。

伍晃榮完場前先趕到，未必可以客觀評論整場賽事，對每位隊員作出秋後算帳亦唔公平，今次嘗試講出各線主要問題，希望會有改善。

前線

其實今場個頭擺得算ok，射門次數尚可，反而係中場支援較少，比d波又難控，好難有所作為。唯一既小問題，可能係以後再試下多d走番出黎，迎波之餘又可以拉空對手。

落到場發覺我方明顯比對手弱，呢個時候，假如箭頭把握能力強，有時真係一次射門就搞掂你！當然咁既要求，對前鋒好唔公平，不過事實上前面既隊友，如果可以提昇自己既準繩度，分分鐘單天保至尊，一命救全家。

另冰人今場條過關飛又開始串過，好野～

中場

ABC眼觀察，中場表現比較令人失望。由細到大嘆慣慢板既老昭，依然覺得冇必要去得太快。我完全唔反對踢波講求速度，但想快，起碼要快得到。胡亂咁衝，又或者有波就忽，咁樣快法冇乜著數。我寧願控球在腳，慢慢搵機會。

中場隊員又有個毛病，就係hold個波太太太耐，拖得太太太多，影響中場機動性，最慘仲要箍完一大輪之後，十次有九次都因為比人愈迫愈緊，結果草草傳球，傳到離晒大罩。咁又何必呢？自己踢得辛苦，又無作用。希望準備交波既隊員，多d為準備接應既隊友考慮，可以的話，交個好手+羅一點既波，唔該。

此外中場攔截力今場亦頗差，對方輕輕鬆鬆就去到禁區頂。

後防

缺乏一個重心球員，可能係致命傷。本來阿Mark或者肥丘可以擔當重任，可惜阿Mark呢位經典球員唔係成日chok到出黎，肥丘個箭咀又成日向下。因為老昭最終都會返入禁區，真係要諗諗。如果要搵件正宗啦士殺人殺波，就只有係去「精神病癲狂綜合研究所」搵返３０年前既廣州殺人王－“阿Sir”…

有球迷提出，打後隊友標波、降波時有失誤。呢個係防守意識既問題，好難講幾時標，幾時降，打得多後自然會知。

另，隊友一個“標”，一個“包”呢種合作默契好重要，只要時間配合得準確，對方十個有九個都會失波。各位《烏合之眾》長工或撈散後衛，燃燒你地既忿怒啦，唔夠人砌，就用個勢嚇X死佢地！

龍門

今場繼續由鍵鍵客串，勇戰下爆眼 + 爆眼鏡。失到７粒都冇乜計，希望唔好太過打擊佢既士氣。因為守龍既野，士氣真係緊要過技術好多好多好多好多…

賽後，大部份隊友都話今場好玩又有意思，希望主辦單位搞多d呢類型既賽事。主辦單位承諾一定會從善如流，大家都要汲取經驗，提昇自己，下次再踢好d！

賽後CEO多次強調下場賽事無論對邊一隊都好，一定要

「祭九佢旗」~~~

…依家你話事！？！

【表現指數】2個叻 CC
【開心指數】3個hap JJJ

05年6月12日（主場西）卡臣

比數：３：１（符焦、徐波、蛇頭or徐波）
出席：
1. 鍵鍵
2. 阿Sir
3. 老昭
4. Andy
5. 阿冰
6. 林家亮
7. 劉輝
8. 符焦
9. 徐波（客串）

《重要聲明》下次咪再１０點開波，頂唔蒲呀～ 今場約到隊後生仔新對手，一個二個又高大又靚仔，證實烏合之眾名符其實。

整體表現：

技術方面，新對手似乎稍欠火候，結果烏合之眾竟然可以成場手+禁住人黎砌，施展巴斯隆拿圍攻戰術，實在信不信由你。賽後林+亮提出下次再約呢隊可以book半場，好X串下。

金牌冰人條無敵過關飛終於斷纜，求神拜佛，冰人唔好又試成為下一個唔識入波既烏合之眾前鋒。 由於輕鬆取勝，各人在輸打贏要既心態下，一片歡笑聲中結束是日賽事。

有感而發：

伍晃榮場邊觀戰，有段時間，陣容方面金裝四大前鋒（林亮／冰人／Andy／劉the）竟然有３件在場，再加上御用閒人徐波，雖然防守能力存疑，但無可否認４件箭頭都有入波能力，假如劉the保外就醫期間，醫好埋隻優柔寡斷既右腳，你話幾甘令人扯旗呢…

註：是日陳鼠又溝仔，仲要愈溝愈後生果隻，你條木契係咪玩僻好野呀？！

陳鼠
客串守龍，身手猶在，幾野單刀撲救既有料又好鬼理所當然。被射入一記罰球，隊友歸咎指揮人牆失當，陳鼠駁咀個波碌左去第度不過費事煩云云，甘九拿西仲衰過技術渣！

三十九幾度著長袖衫守龍，睇見都中暑，下次都係比番殘廢人守算喇～

岑蛇
針冇兩頭利，進攻意識穩步上揚，開始轉型為創意中場既同時，防守能力有d倒退。以往每場炒番兩味既場面不復見。遠程炮的確準繩，不過似乎有d濫交情況。入第三粒功臣：先偷去隊友Andy腳下球，再似射非射，慢鏡頭high到少少徐波慢流尾袋。

指使Andy飛的到場，出口術「車錢我比！」結果不了了之…

老昭
差d重蹈阿鼠覆轍，兜野鑿落對手個後腦筍，幾乎又搞走一隊波。打閘由於對手較弱，助攻次數唔少，亦有數次起腳，可惜對方血肉人城，結果門都唔到。

（心聲）當我望住對手摸住個頭好痛苦既表情，個心真係慌攬到PK…

林+亮
憑住痴X線既個性，過關斬將能力極高。踢前夠癲，打後夠喪。策動攻勢帶黎第二粒。首先右後防發爛過兩件，再傳比近底符焦，符焦後腳彈蛇頭，蛇頭再撥比徐波撞入。超過半隊波（４個人）參與過程之餘，對方更完全掂唔到個波，冇X得頂！

煲煙時間不斷狂串劉輝，高潮迭起，嘆為觀止，不能盡錄…

劉輝
拗柴已經成為劉輝既嗜好，而呢份嗜好，係由舊同學符焦一手栽培。事後解釋因為鞋帶綁得唔夠實…你估輸drink管咩！又話個地唔平…你估機場咩！今場狀態回落，表現一般，不過能夠為隊友帶來歡樂，成就更加偉大。

賽前／賽中／賽後均被隊友不斷中傷，難得仲笑得落，真係一d羞恥心都冇～

冰人
雖然斷左條過關飛，不過最值得一讚係成場波冇話為左條飛死射爛射，多次作出二傳one two，大公無私為隊友製造最佳埋門機會，再加上應射得射，幾次埋門入唔到波只係欠運仔，今場完美甘演繹左靚仔箭頭既本色。

向來低調沉默既冰人，都忍唔住要彈劾劉輝果舖拗柴癮。

符焦
交左會費而又唔到既球員，一直深得球會歡迎。今場久休復出風采仍然，技術指數高企。波底絕對唔使懷疑，打啦士對住較弱對手，學陳鼠講法，得閒到可以溫功課或睇咸帶。踢到落後一粒時，忽然唔聲唔聲右路放個凍箭，仲要係遠柱網仔果下手+羅X命。

球場上踢來輕鬆寫意，反而賽後串九劉輝時仲流得多汗…

Andy
伍晃榮親眼目睹Andy多次好靚甘痴左個高波落黎，又有次邊線位好巧妙甘控左野，不論基本功同穩定性都冇得彈。今場打後時間較多，少左攻門，變得冇甘搶鏡。除左一兩野發X盲好地地交個波比人，其餘時間保持應有水準。

唔知係咪飛的黎，假如真係就比蛇頭冼左鑊。下次醒扒喇！

【表現指數】3個叻 CCC
【開心指數】5個hap JJJJJ（爆炸！）

05年6月5日（主場西）羅仔

對手：暗渡陳倉
比數：２：０（阿Rex、阿鼠）
出席：1. 鍵鍵2. 阿Sir3. 朱東4. 老昭5. 阿星6. 阿Rex7. 林家亮8. 劉輝9. 阿鼠10. 阿蛇11. 徐老波父子（客串）

好奇怪，今場波表面睇來好似冇乜人到，但數落原來都有大拿拿１０件。傷殘人士劉the單腳到場，誠意可嘉。更客串守龍，真係整親冇人可憐。

老昭傷患影響棄關出迎，車輪龍效果平平。祝福老昭儘快康復死番入禁區。

對方龍門曾痛哭哀求我方射波，唔知點解？

是日鼠鼠又再次成功溝到另一隊波，亦整左場１０分鐘飯後甜品，先dum雞０：２。對方曾盤問：

「你隊波叫咩名？」

球隊發言人鼠鼠竟然熬底唔敢響朵，一d全部用處都沒有！ 畢竟《烏合之眾》呢個名又係比較難開口，算吧啦

今場表現：

整體有d亂，去得太急，中場欠缺手+查車+立人，９成以上都係自己斷纜。其實現時人腳，應該可以踢定d，控球在腳，應快得快，踢波既野，簡單直接… 最後淨贏兩粒主要係對手較弱。不過所入兩粒都幾靚仔。

• 鍵鍵－啦士穩鎮，踢前side左，中場上腳好過
• 阿Sir－狀態反覆，心神彷彿，可能係諗起部攪拌機
• 朱東－場邊溝女，精神爽利
• 老昭－寶刀未老，包括杏+橙脾氣
• 阿星－火星撞地球，衝散晒所有野
• 阿Rex－今場有勇有謀，人又靚仔，好！
• 林家亮－癲起上黎冇人夠佢癲，守龍都
• 劉輝－成場不斷鼓勵隊友，振奮士氣，好榜樣
• 阿鼠－千古罪人，一腳射走對手，意圖將功補過（不遂）
• 阿蛇－走d位幾正，經常拉空對手

【表現指數】3個叻 CCC
【開心指數】4個hap JJJJ

05年5月29日（主場西）林同學

比數： 唔記得（總之贏啦）
出席：

1. 鍵鍵
2. 阿星
3. 林家亮
4. 阿Sir
5. 阿Mark
6. 劉輝
7. 肥休
8. 老昭
9. B仔
10. 阿冰
11. Andy
12. 阿Rex
13. 徐老波（客串）

今場表現：

整體好good，加上天氣陰陰地唔太曬，各人有水準表現。

• 阿Mark + 肥休打後
• 阿星 + 阿Sir中場攔截
• 阿冰 + 林家亮攻門
• 加上老昭神經刀守龍

呢個陣可以話係近來頗成功既starter。唔好忘記，前仲有Andy，中仲有鍵鍵，後仲有B仔，連守龍都可以換泰國人

嘩～烏合之眾翻生呀！唔怪之得，開始搵唔到對手… 今場失波，主要係因為徐老波射兩球世界B，加上後衛玩野失誤。不過，作為守龍既老昭，亦唔覺得有咩咁大件事

失波完全無問題，最緊要係踢得開心，踢得過癮。

【表現指數】4個叻 CCCC
【開心指數】5個hap JJJJJ

05年5月22日（主場西）Edward

比數：５：４

烏合之眾《三》加強版推出後反應熱烈，所以本頁球迷世界都翻生。加強版比起之前完美版既分別，就係加入左阿Mark等及鍵鍵舊生會成員，亦大大加強左烏合之眾實力，不論係贏或輸方面。

是日精華：

就係頭１５分鐘，烏《三》竟然憑阿星、阿Sir及老昭３個成世唔入波既隊員大巢對方３粒，之後大家都好似收夠籌一定贏硬咁，加上是日天氣大熱，成支水由頭倒到腳都會蒸發晒，再加上出席球員僅僅得８個，實在有心都無力，再再再加上Edward暫時係對手中最強既隊伍，技術有番咁上下，踢踢下唔經唔覺就係咁輸番４粒，以烏合之眾I及II既過往賽績黎計，其實都係意料中事，有乜出奇嗟？

正當球迷紛紛滅飛離場之際，奇蹟就係呢個時候出現係烏《三》身上，先由阿sir開罰球省向對方後衛入網，然後再由烏《三》金牌前鋒 iceman 射入最後一球，之後烏《三》拿拿林割禾青力保２００５年不敗紀錄，結局可謂出人意表。

事後星爺話：

係~因~為~領~隊~陳~鍵~無~落~場~所~以~先~贏~波~

正所謂字字鏗鏘，如此敢言，換黎大家英雄式既歡呼！

04年5月2日（主場西）B友

天氣：熱過塊田
有：鍵、朱、蛇、昭、鬼、乙、黑、Mark、星
比數：1比2

p.s. 是日黑人扭親腳受重傷，於是第晚落D進行反物理治療。現時情況良好。

是日表現總結如下：

- 鵰 -

04年4月25日（主場西）Roy

有：鍵、朱、蛇、昭、鬼、賊、乙、黑、Mark、星
比數：7比2 (係咪呀??)

鳴謝賤賤百忙中執雞，一粒鐘好過冇。

是日賤賤、老昭及黑人遲到。有消息指賤賤遲到係因為要等老昭，賤賤表示保留上訴權利云云。法官話，法律面前，人人平等，話九知你因咩事！！ 根據《烏合之眾II簡易治罪條例》，兩人已即時被票控及罰款各五皮。

試過約幾隊都唔得閒應酬烏合之眾，今場開波前唔夠48小時先至臨時約實Roy隊作賽，所以都特別鳴謝Roy隊臨時班齊馬應戰。

Roy隊礙於球員平均年齡較大，氣力不繼下，烏合之眾先至能夠響老馮先失波下反敗為勝。不過唔駛咁高興，皆因今場反而係近幾場踢得最差嘅一場。因為烏合之眾梗係平時嘆慣，鍾意踢歐陸味重既逆境波，習慣比人搶疆，唔識主動入閘，故雖然入到七粒咁多，都只不過因為對手未末段呈現半放棄狀態。成場波其實踢得冇厘章法，得個「亂」字。各球員可憑呢個「亂」字，到各大書報攤換「屌」字掛曆一個，吊響屋企陪添自信。

入到成七粒，伍晃榮都冇辦法記得晒d波點入。總之好似徐乙入幾粒、劉the有入、賤賤好似有入咁上下。但咁都唔等於前面踢得好，或者應該講可以踢得更好更流暢。

中場人就多，可惜既幫唔到攻，又幫唔到守。缺乏功夫良下，冇辦法控制球賽節奏。

後防今場可謂最差一條線。初段七七下比人省入兩粒先至訓醒，及後唯有一味有波就大腳fuck，話雖穩陣，但係……都係唔講，費事又比人小。

簡評

鍵
前中後踢勻，平淡乏味，更得人驚係已經算有表現果個。

朱
大失所望，全場垂頭喪氣，無影無蹤。

蛇
實在醒唔起有咩貢獻。冇人死傷既日子，總叫人口啖啖。

昭
失第一球懶醒唔接左佢，反而搓番出黎，結果擺隊友上台。

鬼
初段慌失失，末段咪埋眼野野大腳清，算做到本份。

賊
比老昭扇左鑊，擺老烏，其餘時間發揮唔到最高水準兩成。

乙
全攻型球員，甚少參與防守，中場位置由得人掂行掂過。

黑
到場目的本為與賤賤證實某種足球理論，後事如何，冇人知。

Mark
跚跚來遲，踢得一陣，發揮唔到乜滯。

星
踢閘，撇除時有走漏之外，表現算做較為搶鏡。

【整體表現】CC
【開心指數】JJ

04年4月9日（主場西）Sunny

有：鍵、朱、蛇、昭、康、蕭、Lee、Mark
比數：1比3

分析局勢：

天好陰但又唔落雨，就知烏合之眾有運行。經過上場阿蛇以一己之力掃低對手一D全部一D人之後，今場Sunny隊依然赴約，證明後生仔冇有識死。

踢波既野，士氣最緊要。近幾場《烏合之眾II》幹勁十足，開開心心，整體表現提升唔少。賽後投票緊張刺激，各懷鬼胎，峰迴路轉過十字路口徘迴。可惜《烏》隊擺脫唔倒球壇心理醫生既魔咒，踢得幾好都要輸波而回，入球能力二十年來未見起色，證明烏合之眾係念舊而又有個性既球隊，世間少見。

整體表現：

踢左廿年波，先終於明白踢唔掂後場搓波。而家踢大腳吊，後場失波少左，最重要係減少因為後場失波而令士氣低落。

今場繼續簡單直接，整體OK，不過間唔中急得滯，盲目亂忽，浪費機會。應該平衡下好D。

不過是日位位非常勤力，應記一功。將呢份精神擺響溝女度，一個月起碼卓十件八件。

鍵鍵單前鋒，肯走肯撲，做到第一浸破壞工作。阿蛇搶野之餘，開始細心用波。劉the打後穩穩陣陣，穩步上揚。老昭出番黎踢，加強壓迫性。今場更意外發現原來察差守龍最勁。希望大家生生性性，靚晒~

鍵
單前鋒確唔容易踢，體力消耗極大。今場頭頂腳踢，可惜缺乏入波觸覺，浪費唔少機會。唯一入球來自蕭丹中場落力拍甩對方腳下球，再直線交鍵鍵，鍵鍵一搪射入大細龍門。賽後鍵鍵表示射到冇晒信心，阿Lee提出買兩本咸書刺激雄性激素，不妨考慮下。

蛇
做左十幾年垃圾佬，開始轉型踢技術型中場，唔知係咪人大左，就黎做老豆，唔想再殺生。今場有球波一dup一拖過兩件，非常精彩，可惜之後連自己都攞唔番個波。如果想中場分到波控制賽事節奏，建議做多D破紀錄，同埋練好D條左棍。

昭
初段守龍，表現麻麻，被趙入兩粒。中段開始出黎踢，重拾八十年代體力化足球既水準。幾次標甩對方後即時製造埋門機會。今場數次起腳，可惜搞完一大爛餐臨起腳先至話冇力，唔好去死！

朱
劉the真係一個係估佢唔到既球員。初段踢前，靜英英冇厘火氣。後段打後，除左甩過一次咁大把之外，其餘時間包~晒。頭槌殺晒，解圍清脆利落。有球波頂走對方角球攻擊後慘被察差「登廚」隊正C眼，奇在反而露出曖昧笑容。真係估佢唔到…

康
踢細場又試唔知自己想點。原來最鍾意人地單刀衝門。守龍超勁，救出十九幾次必九入球，野野撞埋一堆，仲流晒口水猛話好鍾意好鍾意，唔係變態係咩？一個高波埋黎即刻整親，因為唔鍾意。今場榮登票王，成為繼鍵鍵後第二位單場最高票數球員。

蕭
從來冇諗過，一架拖頭可以用勤力黎形容。亦都從來冇諗過，蕭丹可以有咁大既活動範圍。今場射門次數唔少，先有靚絕頭槌頂正柱角，再有左邊窄位重炮被龍門封出。粗身大細可以有咁既表現，相當難得，真係一個好媽媽。

Lee
可能係人類歷史以黎，一場波入面，一個球員追波最少紀錄。事後解釋要留力踢下場，唔通因為咁，今場要製造不在場證據？

Mark
狀態比上場稍回落，牛皮偏軟。包後與隊友誤會，製造驚險場面。未段踢回應有水準，最弊已經夠鐘，後市仍然睇好。

【整體表現 】CCC
【開心指數 】JJJJ

04年3月28日（主場西）Sunny

E：金蛇郎君、天眼東、五六七八、外籍人士、超陰鼠、察差、怒人乙、黑色人種、Andy、星、地中海外援、肥丘
%：2比1
<：Andy、地中海外援(B仔)

整體：

經過上場慘敗後「幸好」檢討，今場賽前士氣唔錯，連有冇人遲到都唔為意，令庫房一度緊張…成班友踢來信心十足，最難得係竟然反敗為勝，十分罕見。

對方球員經常性無故跌喺地下上面，更出口技指控(洞悉？)說道：「嘩~~~呢個(金蛇郎君)好矛架，小心D佢啊！」！金蛇郎君見贏一球在手，即時借勢發爛，賽事亦因而草草收皮，《烏合之眾II》順利割禾青。

戰況：

一開波由骨幹球員落場再搭Andy，效果最好，踢來少咗以往初段患得患失情況，可能因為自從超陰鼠上場開始踢前，踢法改為迎合成年人口味的大腳吊，速速埋牙，減少後場喪搓，隔靴搔癢浪費波鐘。結果果然搞到對方門前風聲鶴唳，彷如80年代阿仙奴攻門鏡頭一樣，幾萬人雲集小禁區開party，幾乎暴動咁滯。可惜射門次數唔多，加上對方有幾件都扭得兩野，憑個人技術我方後衛一、兩次被扭甩朱頭再射腳，幸好只係得一、兩次，加上五六七八今場波有心機，故力保貞操。

踢踢下，唔記得邊個喺我方禁區內與對方有少碰撞，竟被超陰鼠吹罰5碼，結果率先被省入一粒。

《烏合之眾II》及後企穩陣腳，憑大腳吊比超陰鼠再set比隊友嘅天真無邪踢法，搶回唔少攻勢。結果由超陰鼠右路傳交Andy撞射入網，追成平手。

之後對方某好扭球員曾扭過五六七八射空門，幸唔夠腰射網側。

其後亦有怒人乙精彩怒射中眉，最後由地中海外援中前場右路忽然施放冷箭遠射得手，以2比1勝出。

個別：

金蛇郎君
重拾鐵閘本色，清波相當清潔，據統計幾乎冇甩過拖。hold波穩咗，亦冇話急急腳亂交咁交比人。踢法始終較惹火，被對方出口中傷，差D撻著瘋狂的血，《烏合之眾II暴力關注組》見狀即時終止比賽，以免屠殺事件。

天眼東
今場夠晒定當，始終走火警高手，驚都未過。初段踢中前，睇通睇透，多次傳出靚波比超陰鼠，亦少咗無定向喪推，失波數字大大減低。後段踢後，高波解圍清清脆脆，穩穩鎮鎮。

五六七八
雖然開波冇耐即被對方射入5碼，但冇發爛渣，證明今場波好認真。及後三番四次救出險球，更奮不顧身拍去對方腳下球之後口心食咗腳應，冇功都有勞，咁先換倒全場最高5票，龍門有此成績實在難得。

外籍人士
發X咗神經，防守稱職之餘，扭完一件又一件，加上連平日最弱嘅高波都有埋，即時獲頒發飛躍進步大獎。

超陰鼠
踢前走動極多，左撲右撲，令對方後衛冇辦法慢慢搓上。高空波全隊之冠，爭爭埋埋，可惜中場球友亦浪費唔少。比起上場，今舖狀態略為回落，可能因為對方後衛較硬淨之故。第一粒間接功臣。

察差
近來患得患失，完全發揮唔到應有水準，更完全喪失位置感功能。今場打後做唔到防守工作，參與助攻時走D位又好難交。喂~ 咁唔掂喎，好快快操番起。

怒人乙
改踢中場好好多~~~~ 應交得交，應射得射，曾遠射中眉，冇運仔。近年來踢得最好呢場。

黑色人種
成身青BB到場，一度惹來恐慌，莫非買咗今場主客和上盤親自監場？踢咗4分鐘，因缺氧問題提早收皮，不過比起好多人黎講，總算有心……

【亢奮度】：ììììì

04年3月21日（主場西）鍵書友

報到 ：蛇、蕭、昭、鬼、良、賤、Rick、偷、乙
比數 ：2比5輸到…街…家…化…
入球 ：乙、賤

對賤賤「傾史」書友仔戰況一如所料，《烏合之眾II》排山倒海咁比人蹂躪……假如呢個時候，有件後生時踢過下波嘅老豆，拖住個天真無邪嘅仔經過嘅話…

• 天真無邪仔：(天真無邪地)爸爸，爸爸，如果無咗技術，會係怎麼了？
• 踢過波老豆：(慈祥地)如果冇咗技術，咪好似踢緊波班契弟咁，亂九咁黎囉！
• 天真無邪仔：爸爸，爸爸，如果無咗士氣，會係怎麼了？
• 踢過波老豆：如果冇咗士氣，咪好似踢緊波班契弟咁，亂九晒籠囉！
• 天真無邪仔：爸爸，爸爸，如果無咗冷靜，會係怎麼了？
• 踢過波老豆：如果冇咗冷靜，咪好似踢完波班契弟咁，互九片囉！
• 天真無邪仔：(繼續不明所以地)爸爸，爸爸，如果班契弟哥哥仲唔改善，會係怎麼了？
• 踢過波老豆：(嘮氣地)如果班契弟仲唔改善嘅話……九知！！！ 走啦，衰仔，大個左唔好學佢地啊！

後生時踢過下波嘅老豆，心裡帶住唏噓，手裡拖住個天真無邪嘅仔…慢步遠去… 而佢背影．．．就好似係．．．

註一：今場賽事賤賤勇奪10票，事實上亦踢得好，抵表~~~揚！
註二：鬼 rick 勇戰受傷，球會對此表示嚴正關注，並著手成立跨部門小組．．．討論！

04年2月22日（西環沙倉）Mark n’Friends

J：西環沙倉再度重遇Mark哥
?：鍵、蛇、昭、良、乙、鬼、Rick、強、康同事甲

比數：2 : 1+1+1+1+1+1+1！

註：踢唔慣石仔地

鍵：一般咁上下

蛇：技術明顯一天一天進步，但陋習傳球失誤過多，一日未改，都只能當二線球員。

良：Good try ~~~~~~~！中場大腦！

Rick：技術好，可惜發揮不順，難得一身好本領…未能盡善，令人失望。

乙：發老爛狂媽康同事甲，其他時間踢來毫無火氣。

昭：又守龍又出來踢，氣力十足，只嫌兩頭唔到岸。

康：恍惚被鬼佬施下魔咒，失魂落魄，希望球隊可動用基金替其作邪作鬼作邪作鬼作邪作鬼…………..

鬼：失魂鬼是也，嗚呼哀哉，必須努力以求突破。

【開心指數】JJ
※今場賽事由陳老鼠筆錄，老昭抄錄，阿蛇up撈。

04年1月25日（主場西）Sunny

"""""""馬騮年新春賀歲杯 """""""
大年初四午時至未時對Sunny隊

有：鍵、朱、蛇、昭、偷、良、乙、鬼、Rick、強 (嘩~成村人)
比數：2 比 3

註：今場賽事，朱、昭、乙倒戈相向，三人唔踢烏隊即有出色表現，問你死未。

鳴謝鍵溝到一隊唔錯對手。精神可嘉！

新正頭喜氣洋洋，烏合之眾各球員唔駛返工，玩夠賭夠，醒醒目目，踢來尚可。

表現：

鍵
瞻前顧後

蛇
攔截力強

小偷
踢法刁鑽

良
機動部隊

鬼Rick
穩穩鎮鎮

強
初到貴境

乙
表現回勇

昭
遠射得手

朱
射手本色

【最值租球員】：朱西
【開心指數】JJJJJ (爆九晒燈！！)！

04年1月18日（主場西）Mark n’Friends

有 ：陳賤、撈the、阿Sir、老昭、西人 五件咁多
比數 ：贏 (卦?)

今場賽事由於有關方面技術錯誤，約錯場鬥錯波，加上遇上冇品波友拒絕跟隊，導致賽事爛尾。烏合之眾主席陳鍵就此事已經大發雷霆，媽勻三司十一局，盡顯強勢領導本色。各位敬請自行前往八號窗跳落去謝罪。

各球員表現蘿毛。

03年11月24日（西環沙倉）Roy

邊個：鍵鍵、夏文、岳飛、爸B、阿Sir、老昭、泰仔
比數：2：3

睇到少少magic hour，好浪漫呀~~~開講有話，「天有不測之科幻」，估唔到瀕臨絕種既烏合之眾足球部竟然再度上市！仲有足足七件到場，符合《烏合之眾II條例 (白紙草案) 》法定之合法集會人數！只要操多幾課、集多兩訓，烏合之眾復牌有望！

久休再賽，眾隊員踢來精神奕奕，訓夠抖夠，步頭舒暢！雖然輸波而回，整體喺冇被對方壓迫下，全場做出不少爽快傳送，呢樣野係相當值得鼓勵！

=================== 賽後報告 ===================

鍵鍵
死唔眼閉，係都要冇果樣整果樣，令到烏合之眾再次有機會再同各位球迷見面，實在眼冤！整場賽事瞻前顧後，得心應手，踢波既野，比波走位，簡單直接！可能想搓多兩腳關係，較少過人突破！

夏文
體育記者尚未到場已經領野，初步觀察，應該係因為咬柴而跌響地上面，據講相當岩重！場邊休息一輪兼夾打左個長途電話之後再次落場，可能受傷患影響，就住就住，無甚表現！有本事試下豁出去、九就丫笨！

岳飛
據稱本來約左小學同學，唔能改得，後來又忽然亮相！岳爺爺是日唔駛陪岳太放狗，心情大快，與民同樂！賽後仲獲批准與三五知己打埋邊爐先至返回監倉！今場踢來算積極，穩穩鎮鎮，攻擊意識唔錯，不過幫波都係太少！

另外，球迷朱先生賽後出左個謎語比大家，謎面係"比賽過程中斬左球好靚既波比岳將軍"，謎底估利物蒲作賽陣容喎！？？？大家慢慢估！

爸B
跚跚來遲。由於細場關係，唔做得以前一樣企響站頭等的士，走動算多左，拍波搶波攔波唔少，可惜浪射更多！左右開弓，射極唔中窿！幾經辛苦先至入番粒！

阿Sir
表現令人驚喜，踢中場除一貫攔截工作外，亦參與唔少攻勢，少左慌失失交波比人！其實小型球邊有分攻/守中場，踢法全面D梗有著數！不過陣時都係太過保守，下次即管放膽去比波放波，多謝。

老昭
熱盛度加分，唔該！響屋企趕完稿即時打的到場，只係遲左半個鐘，應該唔會辣慶有關單位！今場守龍麻麻，比人趙入兩粒，第一球如果狀態好D應該唔駛失。

泰仔
闊別多時，風采依然故我，dup低頭，踢足球。可幸冇左向後扭，不過比波有時古古怪怪，極具個人風格。睇得出波底實在唔差，控波傳波有板有眼，屬有技術而效率較低球員！

小插曲 ~~

今場賽事甚多球迷場邊吶喊聲援，更一度情緒失控衝入場內！幸好烏合之眾與時並進，順應民意腰斬場事，冷卻球迷高漲激情，否則勢將與球迷打成一片。

備註：

除爸B外，每位到場球員大拿拿夾左10皮，回饋社會。到底《烏合之眾II》能否成立？呢場又會唔會係２００３年最後一場波？大家只有拭目以待！

03年4月18日（鰂魚涌人就炒）黐波踢

?：乙、朱、昭、鍵、Sir、肥

黐波踢下包辦兩個入球，有少少料黎。

第一粒：
老昭後場右路交前比老朱，老朱再交深D比好波隊友，好波隊友沿右路推過底線出地波，徐乙衝前一個唔該撞射入網。

第二粒：
某隊友前場左路扯個急勁中腰波比右路小岑，小岑竟然又控得底，之後再吊入禁區，鍵鍵伏兵遠柱壓~~~~~住某隊友鑿入。

乙： 所入一粒確具前鋒本色，其餘時間一貫徐乙風格。YYY
朱 ：又再被踢傷之餘，證實踢空氣真係會整親。YYY
昭 ：第一件莫氣出場，應該同出場後第一時間煲煙有關… YYY
鍵 ：跚跚來遲，踢後穩健，更上前助攻鑿入一粒，好仁呀~ YYYY
Sir ：今場踢來頗定當，可能係因為結左婚之後，一切盡皆梗局。YYYY
肥 ：全場波指揮若定，不斷指揮隊友「清吖」「清吖」，你唔煩我都煩。YYY

【開心指數】：JJJ

02年7月1日（順利人就炒 ）B友

回歸杯足球邀請賽烏合之眾 VS 徐B舊友會

出席：小B小岑小鍵小康小Lee小昭小朱小良
比數輸1比4

為慶祝回歸五年仲未餓死，馬拉松長跑長有，兼部份山頭原居民即將行成人禮，龍虎山特別舉行回歸杯足球邀請賽！

久疏戰陣，不免手心冒汗，心跳加速，故此部份隊員開賽前特別於波地外圍走番兩轉熱熱身，足證烏合之眾球員十分認真看待是次賽事，對自己要求極高！

是役個別隊員踢出高水準，尤其小B及小東更，可謂踢出身價波！礙於個人技術不足，與及冇咩入波板斧，加上事實上對方確係技勝一籌，結果球潭深理醫心又再一次成功挽救一隊球隊！長此落去本地波必有振興一日，香港隊勇奪世界杯指日可待，恆生指數有望創新高！

另今場波各隊員冇自由走散，整體維持到固定位置，所以輸4球都冇話亂晒籠，算係咁！

踢成點？

小B─前鋒
一家大細出席足球同樂日，場面溫馨到死！響老婆仔女面前大踢爭氣波，積極參與小組進攻，多次即彈，令前場春回大地！雖然間歇性舊患復發，超崎角位浪子射球，以今場計，總算發揮前鋒應有功能！

小岑─啦士
防守意識保持水準，但攔截力似有跟隨後市回落走勢，莫非獲利回吐？幾次拍人拍波心大心細十五十六，似乎信心不足。傳送功夫仍有待改善，辛辛苦苦搶個波返來，結果又係交左俾人，真係聞者傷心，聽者流淚……

小鍵─前、中、後踢過晒
踢中─控球能力強，隨時過一、兩件冇問題，但未能做到中場最緊要之聯繫前、後場工作。踢後─夠晒硬朗，高空波亦數一數二，可惜本身唔鍾意打後，間唔時會冇心戀戰。踢前─本來最能發揮本身技術，亦係烏合之眾最具威脅前鋒之一，弊在容易灰心，狀況反覆。

小康─名為後衛，實質無從推斷
無國界球員，習慣性亂湧，可能泰國、緬甸一帶最流行之足球風格，要改都改唔到。本來技術唔差，不過毫無位置感，可靠度不足，亦唔能夠為隊波帶來貢獻。由於跟住仲要返工，只落場短時間，表現一般。

小Lee飛刀─中場
烏合之眾中場指揮官，踢法有時幾獨食，愛賣弄腳法，但無可否認能夠將成波串連起來。加上有遠射腳頭，可施放冷箭。今場波就係靠佢於前場右路踢個靚波遠柱入網，逃過吃蛋厄運。唔該晒。

小昭─守龍
查實守龍技術認真麻麻，勝在肯撲願飛，不顧身細。身裁輸蝕，空波太弱。今場波飛來飛去都救唔到個波，似乎係時候認真學下點守龍門。唯一優點係守龍後未發過半次脾四，就算隊友冇里反應仍不斷大嗌打氣。

小朱─後衛
估唔到小朱可以踢後，更加估唔到踢得唔錯！解圍清脆！冇優柔寡斷拖泥帶水之餘，今場波踢來亦見淡定。後段踢下踢下愈踢愈前，又試響右路鑒三喪推，被人兜頭兜腦踢落去，即時恰著左數十秒！事件中冇人理會。

小良─中場
比往日差左少少，機動足球不復見。控波、比波似乎力不從心，唔通鬼良之前一晚去左集訓？(咁都唔單聲呀~)中場少左件發電機，結果成隊波停電。收皮。

技術指數※※※
開心指數※※※

02年4月1日（鰂魚涌人就炒 ）B友

環境：萬里無雲，略熱。
出席：徐乙、小岑、陳鍵、蕭丹、功夫良、肥七、老昭、盲丙、小康、Ken、麥K
比數：輸2:3

表現

徐乙
舊病番發，導致行動不便，成場波無乜點走動過，極少參與組織攻擊。控球在腳之後即時意圖以個人技術盤扭過3位後衛再於超窄死到唔死角度起腳，結果當然係不知所謂。

小岑
睇得出幾落力下，但有落無上，成場波上唔到力，走落冇力，建樹少。中場攔截工作尚可，退回防線，做唔番舊底要波要人果下。以波論波，今場的確叫人失望。

陳鍵
一向以技術見稱，但波唔到腳就毫冇用處。相比起其他高質球員，陳生未能帶動整體機動力，尤其當放於前場，由於隊友唔爭氣，加上本身脾氣及精神問題，經常行行企企，形同虛設。

蕭丹
當其他球員相繼表現失準，蕭生今場波總算叫keep到一貫水平，包括完場即閃風格。防守工作頗見清脆，希望蕭丹唔好自滿，再接再勵，將來靠晒你喇~

功夫良
相對論下表現比應有水準下跌超過50個百分點，更沉唔住氣，直斥隊友種種。踢中場缺少昔日分波走位風範，亦因此直接引致烏合之眾毫無中場可言。

肥七
表現一般。

老昭
狀態低迷。

盲丙
一如以往。

麥K
稀客麥K久休復出，身懷六甲粉墨登場。完場即轉介至婦產科處理。

02年2月27日（主場西）Roy

天氣：凍過塊田兼有毛雨，能見度 80 percentage，海有中至大浪，打鼓嶺道錄得開埠以來肥仔一個月之內蒲頭次數最多紀錄。
到場：2號仔、6號仔、7號仔、10號仔、又係10號仔、11號仔、12號仔、20號仔、21號仔
比數：8比2

烏合之眾足球，一千年開花，一千年結果，久休數十寒暑，終於又開番波！

鳴謝

今次踢得成，全賴有人自動自覺book場，有人落力吹雞，有人約對手，有人踴躍參與等等，實在熱誠可嘉。

賽前預測
本以為久疏戰陣都唔慌像樣，點知踢來似模似樣，技術叫做冇異樣之餘，仲跑得兩咀，實驗證明賽前集訓相當重要！

賽前集訓
為隆重其事，賽前特別拉大隊西貢集訓。訓練內容極為多元化，包括：
劈、隊、勝、清、敬、飲、灌……

食物方面又極之有營養，包括：
薄荷慢幾步、純粹登山……

總之以後每次踢波之前都集訓，肯定可以衝散條鞭。

員工表現“亞披素”

老昭
由於對手攻力平平，加上今場波隊友食錯過期偉哥，忽然硬朗，防守力比平時高出200個百分點，所以守龍基本上都好優閒，差D冷親。一兩下落地尚見功架。末段決定唔落地，即被對方趙入兩粒。

肥兜
初段落場尚算交到功課，打個後衛叫幾穩鎮。末段報稱唔精神，拒絕落場，響場邊扮阿伯博人施捨，被阿里爸爸出口中傷。可能係集訓期間酒氣未散，下次唔飲得咪飲咁多！(有關申請手續請到8號窗拉姑娘查詢)
入球：冇

小岑
人逢喜事精神爽，保持一貫防守力之餘，助攻亦見細膩，又識扯空兩邊，兼夾冇射波落海，再加上冇撩起火頭，而且仲以禮待人，可望推動旅遊業。大個仔係唔同D，記住到時早D到，飲多兩杯……
入球：好似冇

白蘭蕭
離奇出現，一度引起公眾恐慌，有貨響手朋友記住留意市況。講番表現，7噸半拖頭今勻吐氣揚眉，上斜有力，拖波順暢，三手呔掉頭有位剩。近門施射射正中間，可能踢唔慣呢D波，及後放冷箭反而入左！尾段搧呔落地，被控毀壞公物。
入球：1

陳老鼠
身為人一個，竟然夠膽死同一時間著7種顏色上身，可能鬼上身！愛情令性格變得極其文質彬彬，唔再發脾四，改為發傻。成場波笑口西西，不過技術仲響度，可堪信賴。中段被人整左腳，忿而離場作無聲抗議，反被隊友亂片致死。
入球：1

經紀東
近幾場有起色，踢來有板有眼，傳送幾準繩。今場波攻門頗有威脅，其中以接應陳老鼠開出角球頭鎚中眉最有睇頭，亦曾於右輔位施射地波中遠柱。除一兩下仍見優柔寡斷，整體算唔錯。
入球：3 (亦同時浪費大約30個餐士，有違一貫有衣食作風)

功夫良
狀況大勇！攔截力滿分！幾乎截晒對方一D全部一D攻勢。閱讀球場能力無出其右，扯兩邊波扯到硬晒！瞻前顧後，傑出員工熱門人選。
入球：冇

徐乙
相比其他隊友勇猛表現，徐生演出相形見拙。不過生左仔之後，總算明白到好多野唔係一個可以做得晒。今場波多番與隊友組織攻勢，唔再喪扭喪射，終於明白踢足球係咩一回事了~~
入球：1-2

阿里爸爸
做左人老豆，火都熄埋。落場一心一意踢波，不再火爆，冰心訣下踢波更見威力，控制中場節奏一流，進可攻，退可守，中場休息可串肥仔。
入球：1

【技術指數】：CCC
【開心指數】：JJJ

01年4月8日（主場西）Roy

微雨Û
賽果：不詳
出席：大B、阿Lee爸爸、功夫良、阿賊、小岑、小昭、朱總、泰國人

正所謂「天有不測之風雲」，早上起來，個天仲算還可以。去到波地，都好地地。點知，一搭正2點即時落雨。真叫人氣結！只怪忘了出口術……怎料原來出口術最高境界係「九õ知！」唔理佢照踢可也，踢踢下竟然停雨，而且個地仲炸炸聲乾番晒。真係天公造美。

今場賽事，最令人嘖嘖稱奇s者，係各位隊友的體力甚佳?，冇人踢踢下要扯住蝦換人。此情況十分離奇，尤其朱總前一晚飲到大晒，第日竟然準時到不特止，仲踢足全場兼有波入。由此可以證實

「濕滑+球場=朱總+入波」係一條定律Laws of PT

亦可進一步推論出

Wet Yard Non-Natural Edmond Reaction「朱東濕滑不自然反應」

簡稱「WINNER」

體力雖有改善，但開賽初段缺乏集中力的問題仍然存在。無論係懶死認真的比賽，抑或旨在過過癮的友誼波，烏隊開賽初段老馮遊魂，梗係要被人省入兩粒先醒。假如友誼波，冇心理壓力，仲叫做可以重整旗鼓慢慢追。但假如係正式比賽，由於一開波就處下風，於是乎就愈踢愈急，結果，普遍情況下都係被大炒而回。

球員表現

大B
省入唔少粒，亦浪費唔少機會。射門觸覺一流，射門技巧有待改善。反而，今場波最精彩的演出，係參與組織攻勢時甚流暢，冇拖泥帶水，值得一讚C。

阿Lee爸爸
大將之風，踢中場表現可人。除間歇性盤扭過多N令人擔心之外，整體算能帶動前場組織攻勢。

功夫良
久休復出，風采依然，叫人傾慕Y。個人技術超班，閒閒地過一兩件濕濕碎。一傳一射甚具台型。滿場飛，係烏隊靈魂人物。機動足球典範。

阿賊
以成名絕技較遠程炮以言，今場略為失準，數次長傳失誤。其他時間表現亦沉。當然，以阿賊的腳下功夫，踢閘x卓卓有餘。不過，今場波明顯缺乏叫人驚喜的演出。

小岑
初段踢來患得患失，足證小岑係百份百正版烏合之眾成員，可能係受到天雨路滑影響。及後塊地乾了，小岑亦漸踢出信心來。一二次包抄~清脆俐落。今場較少助攻。

小昭
上半部份守龍。早段被省入兩粒後發覺唔對路，即時收歛心神，及後作出一連串撲救。雖然整親手指h，總算挽回聲譽。下半部份踢中後位置，不過不失，不提也罷。

朱總
輿論估佢放梗飛機ñ，估唔到佢又準時出現；坊間睇死佢踢唔夠兩野收皮，佢唔單止踢足全場仲入波俾你睇。看來，朱總而步入人生最重要階段：迴光返照。請大家做好心理準備。

泰國人
未知是否食得豉油多，竟然老抽é！又話同同事有踢開，唔知真定假！說回表現，泰國人保持一貫硬朗風格，不論拍波、射波、扭波、控波都咁硬朗。今場水準輕微回落。

【開心指數】：JJJJ
【表現指數】：%%%

01年2月11日（主場西）Roy

賽果：4比3
出席：阿爺、阿Sir、阿肥、阿朱、阿Dee、阿Ken、阿賊

【製作花絮】

• 中山公園重建後，烏合之眾再次回到主場作賽，即凱旋而歸，西隧口果然係福地。
• 久疏戰陣下，眾隊員踢來有板有眼，算係咁。
• 值得一提係徐大B明明自己唔到都叫人book場，熱愛足球熱愛到咁地步，足總應考慮請
  佢做推廣。
• 另朱小東為大家奔走book場，硬拚四眼仔，態度值得褒揚。如果小東樣樣野都可以咁積極，我話你得就得。

【球員多面睇】

• 阿爺─前一晚鬼咁夜先訓，第日竟然知醒出席！足證老人家有心有力，可喜可賀。老爺醒番喇~~
• 阿Sir─火氣全消，有兩個可能：一，對方踢法斯文，想開拖亦無可奈何；二，近排少食熱氣野，腸胃好左。
• 阿肥─此子能夠於開波前到場，證實左由深圳出發，只需個零鐘頭時間，就可以返到西環。各有心人注意。
• 阿朱─之前一晚個樣好病，第日又立即龍精虎猛，身體機能有可疑。賽後旋即入伍，真男人本色。
• 阿Dee─默默耕耘，到場前晒相、買泵、買水，都幾忙下，但見到隊友們俾面出席，就已經係番晒度。
• 阿Ken─球技有明顯進步，估計應該係隊中唯一一個有抌住落場既隊員。好波！佢呀~佢呀~
• 阿賊─毫七子表現一如以往，不論場外場內、賽前賽後，均一副我行我素的死人樣，真係溝死女。
  

【技術指數】：CCC
【開心指數】：JJJJ

00年9月13日（彩虹人就炒 ）"好大隻"球隊

中秋節翌日公眾假期，烏合之眾派遣六壯士以僱傭兵身份遠征出席，斷估小勝四比三。
陳鍵、小岑、老昭、阿賊、朱西、徐B

陳鍵
好表現
1.無論幾難控既波佢都有本事控落黎。
2.箍個波亦好穩。
3.有膽色扭波
壞表現
1.當隊友交出一個連佢都無法子控既波，就會非常高調地表現出不滿既情緒。
2.盤扭略嫌過多，扭失後亦無意圖或企圖追番個波。
3.己隊有球波搓空晒交到佢腳時，已經係100個%空門，佢竟然撻皮！

小岑
好表現
1.體力佳。
2.攔截硬朗。
3.黐個單前鋒黐得幾緊，令對方無咩計。
4.有球罰球射中眉，無運。
壞表現
1.有一兩球波比較大意之外，整體無出錯。

老昭
好表現
1.睇通球場，交波獨到。
2.做到中場攔截工作。
壞表現
1.極之唔夠氣。
2.任左閘時輕出，由得小岑自力自滅，要不得！
3.射出大撻波，十分樣衰。

阿賊
好表現
1.體力佳。
2.較遠程炮極準。
3.防守稱職。
4.扭波OK。

壞表現
1.無乜。

朱西
好表現
1.今場波踢來淡定，有紋有路。
2.有信心去波。
3.交波幾到位。
壞表現
1.仍然有夾硬推既情況出現。改！改！改！改！改！

徐B
好表現
1.走動不少，似乎係一種胎教。
2.射手觸覺不俗，改變陳鍵之射門方向彈入。
3.控個波都幾好。
壞表現
1.死係要扭到有位起腳，拖慢節奏。
2.鮮見積極搶波。

事後六壯士兵分三路離去。分別係：

B哥B嫂搭111
朱生岑生坐地鐵
陳鍵阿賊同老昭坐113

00年6月25日（主場西）B友

好耐無對徐B朋友，輸零比二
有：陳生、麥生、岑生、朱生、周生、紀生、Lee生、鬼Rick生 + 徐生踢朋友隊

我隊入球能力受doubt，三四個打一個都入唔倒波。原來徐生先係我隊最佳前鋒!! 體力...唔好再講...

• 鍵－ 好喜歡踢前，可惜要擺定搪呔先射倒波喎?? 機會要用表現爭取。
• 小岑－ 體力好DD，但無晒凶狠度。
• 麥生－ 初期出黎踢左閘，除第一腳撻Q，都算幾好表現。後任龍門，似乎比唔上個大後備老昭。
• 老強－ 任後稱職，惜前鋒無入球，頂唔倒幾耐。
• 朱－ 嘩! 今場係超低之作，波又唔追，望都唔望，D表現去左邊 (條女倒)???
• 紀生－ 表現平均，無好無差，從愛因斯坦相對論說，眾人中即係算好好。
• Lee－ 任中場算不濁，但未能有致命攻擊。
• 鬼Rick－ 火火地，皆因大家合唔黎。
• 徐B－ 好勁啊，終於比佢遇上最差既對手。

老實，今場唔係太差，但咁都無"是哥"就更加令人擔心。

00年6月11日（主場西 ）屏勝足球隊

三千幾度底下輸一比六
主家席：鍵、邪、7、賊、朱、慶、Dee、Ken、鬼Rick
客席：邪友兩名
鳴謝：飛髮佬探班

「烏隊」相約「屏勝足球隊」切磋球技，本係緣份。我隊明顯技不如人，不過輸到1:6又過份離奇。體力係最大分野，欲知大家體力有幾差，請看對上五十場賽事。

第一節
上半場烏隊仲叫靠一人走多步頂得住。不過，始終敵唔過「久守必失」呢個大自然既定律，率先被對方前鋒左路射入一球。

第二節
及後曾一度追成平手。肥7後場自由地開自由球，朱生響對方禁區頂車身射左個掛網波。表面證供幾靚。本來略略振奮到士氣，但可惜振奮唔到力氣。及後又緊接被對方射入一記靚絕內彎球。對方固之然射得靚，不過烏隊後衛遲遲未能解圍實難逃法網。

第三節
最後，響體力漸漸流失底下，烏隊談笑用兵地失多4粒。

各隊員表現：

• 鍵－ 久別重逢，技術算無倒退，惜太易灰心，經常性喪志。懷念想當年充滿理想的他…
• 小岑－ 奪然體力水銀地瀉。此子本來踢法就係用體力作壓迫性掃波兼掃人，依家變得有心無力。再咁落去可早領死亡証。
• 肥－ 比較突出球員。任清道夫防守力佳，亦夠搏命。分波較弱，未能發動攻勢。整體叫有交待。
• 賊－ 另一位奪出球員。滿場飛，體力指數可加滿比佢。沉著應戰，可惜嚴重缺乏支援，孤掌難鳴。
• 朱－ 朱生好處是從來無發過一次脾氣，亦無發悔氣。是日省入唯一一球，避過食蛋一劫。
• 慶－ 遲到，亦不在狀態。最近彷彿又變得無咩熱誠，高層可考慮短期內重辦睇波衫、打邊爐等活動推高士氣。
• Dee－ 初段守龍，被射入兩粒。未段踢閘，無位置感可言，貢獻絕無僅有。
• 鬼Rick－ 落場一貫勇猛狠心，烏合之眾唯一能貫徹成名踢法的球員。建樹不多，無復全盛時期之勇。
• Ken－ 傷患關係只落場數分鐘便拜拜你條尾鬆人。咁都到場值得表揚。
• 飛髮佬－ 休息時間觀賞一場比法國對荷蘭更精彩的賽事，做人仲有咩要求先！

終於，大家都明白到自己既實力。想唔想提昇？自己決定。反正一句：落得場就比足心機，踢成點都唔好發脾四，OK?

註：「屏勝足球隊」都有講波：-
http://personal.cityu.edu.hk/~mecchou/newsa06.htm

00年5月14日（主場西）B友

中山公園對徐B新朋友，透唔到氣呀！

球迷世界好耐都無同大家見面啦！不過既然最近大家都抱住「聊勝於無」既宗旨做人，我地就算係幾唔得閒呀，都要寫番兩隻字表示下既。

邊個有黎，邊個無黎，邊個成日口口聲聲話黎但結果又次次無黎，都無咩必要講。唔通我話：「阿肥西又試放飛機啦」咁咩？總之，大家心照啦。

老喇，真係唔夠後生仔好氣好力。不過呢個唔係藉口黎既，事實上對方波底真係比我地好，普遍都扭得兩咀。我地D波，係粗枝大葉D。

結婚唔通對一個人真係咁大影響？徐老B婚後初次上陣，立即趙四粒返屋企。唔係麻？舊底佢等的士架喎？無論點，我地成班隊友祝福徐老B繼續數糊，唔好比佢停！

其餘隊員乏善足陳，係阿賊表現較佳，輕輕帶動到瀕臨斷氣既隊友。

最值得一提既係果兩件小背心。嘩！真係唔知揀邊件，兩件都咁涼爽！奇怪既係，當大家興致勃勃上下一心咁去睇好野既時候，阿賊哥聽後竟然朝住差哥方向走去。下？無野呀！你唔好嚇我地喎！阿賊，下次自己踢自己既時候，你千祈唔好mark我呀~~~~！

雖然唔知幾比幾，不過都好開心！

00年3月12日（主場西 ）cancelled

聽講話對徐B朋友，大雨喎，無雷無電。賽事取消
由於天雨路滑人情冷暖關係，是日賽事取消，一眾無恥隊員大步檻過徐B之粉紅色炸彈追捕。皆大歡喜。
徐B君，發揮你的射手本色啊~~

00年3月5日（主場西）佚名

對不知名球隊，驚蟄，打小人
有：鍵鍵、岑岑、肥肥、LeeLee、賊賊、東東、慶慶、蕭蕭、昭昭、KenKen、BB、良良、RickRick

今賽波最重要係老牌前鋒徐B宣佈做老襯。即時各隊員議論紛紛，有人提出玩新郎鑊甘有仇報仇，有人提出唔收請帖收email得喇，有人提出到時做人情買條煙撘兩副啤，有人建議睇定D阿嫂班姊妹既質素先算，聽到阿徐B心都慌埋。

講番場波，由於約唔到及被放等等，結果同不知名弱雞球隊對賽。可惜烏合之眾踢回南天足球，雖然贏但絕無強隊本色。老昭由於傷患關係串演龍門，亦飛出幾球不在話下。今次以龍門作為觀點角度，評論下球隊既問題。

最深刻既印象係陳鍵真係好好波，起碼響烏合之眾黎講絕對係。就今場所見除左自己sea food痕亂扭之外，其他時間可以話無任何失誤。交個波正正經經，控腳波企企理理，睇得出每個舉動(除左扭sea food花之外)都係為球隊整體利益，唔係為左要show自己既身價。

朱東近幾場有好明顯既進步，開始輕輕有D功架，不過回轉後場甚不濟，請注意。

小岑既防守力非常穩定，分波亦見成熟。今場波放響左閘，即時睇到弱點：無左腳。雖然都唔係大問題，但練埋條左棍必定更上一層樓。

今場阿良腳仔軟軟，亦好早撇左，似乎同佢日前返大陸公幹不無關係…

肥仔唔夠力斬波，亦即等於基本功不足。大大聲指揮遠處陳鍵走深D走深D，但係"斬"左無遠面前既蕭丹。其實唔單只肥君，隊中大部份球員都同佢一樣，不過踢位所以先唔礙眼。如果調動下位置即時水銀瀉地─D弱點。

阿Ken犯上兵家大忌：發隊友悔氣。講射術阿Ken非常精湛，講發悔氣阿Ken非常熱中。老昭身為過來人亦曾作出當面指責。請緊記如果想組成一隊強隊，士氣比其他一切包括技術體力等更重要。

左右閘位置日益吃重，除左要攻守兼備，仲要體力、速度、傳送，甚至射門都要有D底。要積極助攻，又唔能夠失位。除非中場改善下唔夠人搶同分波力弱既缺點，否則踢閘會愈黎愈辛苦。下場波對徐B朋友，老昭會繼續守龍，如果效果良好，即管訓練昭君為副選龍門。

朱東既插花開天闢地，影響整個世界，蕭丹既"及"波卻可以令地球逆轉，影響地球。得此隊友死而無憾矣。

00年2月27日（主場西）兄弟足球隊

好很凍呀﹗戰果大勝四比零
有：陳鍵、小岑、老野、胖子、朱翁、昭強、Ken、徐乙、鬼Rick

烏合之眾條例今日正式三讀通過，下場波開始實施，請各界大佬比面執行。

喂，今場波踢得好好喎？

睇得出每位隊員都好落力，亦發揮出唔錯既水準，三線比以往平均。值得記錄在案係前線既表現非常理想。抵讚﹗

喂，隊員踢成點呀？

老野：清閒。對方射門次數唔多，要勞煩佢老人家撲救既情況較少，差D冷靚。經常提場呢下好緊要。

陳鍵：領軍。無論踢咩位，甚至平時講波，都係球隊既精神支柱。隊友好信賴佢，所以佢既表現，包括場內場外，都會影響成隊波。不過睇哂陳鍵頭呢個情況，自從部份球員愈來愈上力之後，已經淡化，係好事黎既。今場省入一球，肥仔左邊古古惑惑角球傳地波出黎，阿Ken漏過，陳鍵禁區頂射入網仔。建議陳君多D正面鼓勵隊友，球隊將來會踢成點，邊個話得埋。

小岑：勇捍。毫無疑問，絕對係成隊波最狼死。但狼死唔代表亂黎，包抄準繩，位置亦佳。中段試過返老本行中場掃蕩，以一己之力爭贏成條中場線，問你死未。依家處於兩難局面，究竟返中場要人要波、定留番啦士要波要人？誠徵各界意見。

胖子：穩定。以本身頗差既速度黎講，能夠踢個閘位頭頭是道，當中既技術要求可能仲高。遇上花巧既對手，話之佢一九拍埋去，但對住快放既翼就危D。初段有氣有力時多番出擊，亦為阿Ken所入一球既間接功臣，傳出一記靚波。末段無氣無力，連斬個波都話無力，想交比陳鍵結果交錯比阿Ken，枉稱鬼腳七，仲死口唔認，枉為人。

朱翁：爭氣。有料到﹗場場有咁既表現，邊個敢話佢唔識踢波﹗前場球員黎講，佢最會返中場幫波，回傳後上隊友，同回防助守。雖然無入波，但多次沉底接應，亦出絕招意圖通人坑渠，志氣可嘉。企過位正到痺，經常呈現單刀姿勢，可惜左腳無靈，浪費左不少大好機會。練埋隻左棍，就一天都光哂。

昭強：動力。戒煙之後體力回昇至本來既水平。一位左右腳俱佳既球員，右左二閘理想人選。試射地波被對方龍門一抱入懷。機動力全隊之冠，可以帶動隊波，不過mark人方面差左。

Ken：膽色。有態既日子，佢係鋒線上最銳利既尖刀，夠姜扭幾件超窄位勁ban。不過個人足球既風格太強烈，企個位好難交，造成近況麻麻。今場波有一粒進帳，肥仔右路括個地波出黎，阿Ken順勢一撥遠柱入網。

徐乙：觸覺。平心而論，講射門觸覺確係人材，禁區內搵機會起腳既功夫到家，左右腳均可叩關更係難得。今場記得帶射門鞋省入兩粒，開齋埋齋。回轉太少，浪費左好多餐士，亦太唔積極，無搶又無幫。簡單黎講，佢既問題係想唔想，唔係得唔得。

鬼Rick：勞氣。上劑整靚手先至叫好番，今劑又比人鋤低，唔怪得佢咁火，即時深切慰問對方娘親。攻守技術全面，另一位能勝任多個位置既球員。攔截力強，不過位置感方面略有不足，踢閘時顧得上顧唔得落，踢啦士時我方攻緊人又企得太後。建議進攻時即管將防線盡量壓前D。

喂，點樣保持呢個水準呢？

客觀講，每位球員都要交到貨。但呢樣野實在無得講，始終業餘波好難要求咁高。烏合之眾不嬲都慣左睇"送"食飯，人腳就係咁，睇下可以點舞。如果想保持今場既水準，起碼必須要做到以下兩點：

一. 上下一心─雖然每個球員都有唔同既風格，但如果想踢出隊形必需要互相配合。
二. 取勝決心─每位球員都要有贏既決心，亦要身體力行落力D。一人走多一步，團結就是力量。

平時踢得差，滿腔熱血見人就小，今場踢得唔錯，反而唔識講。吹漲。

00年2月20日（主場西）細佬足球隊

大霧小哭，是日烏合之眾派出AB隊同細佬足球隊三隊跟隊作賽。

出現：徐乙、陳鍵、小岑、大老爺、肥仔、阿賊、朱生朱太、昭強、阿Ken、、阿良、阿Lee、阿林
失蹤：阿博、鬼佬、慶哥、阿蕭、鬼Rick

今場賽事主辦單位安排失當，原先諗住同人鬥波，後來又決定自己友踢，最後再改為三隊跟隊。好在都踢得幾開心，各隊員都好盡興，如果唔係麻煩友例如昭強之流實聽受丙。烏合之眾自從book場約人鬥波之後，好耐未有再跟隊，就黎同社會脫節。不過訪問過幾個隊友都認為跟隊好刺激。由於對手水平相近，雙方互有攻守，加上隊員響濕滑既場地反而發揮水準，算係近期較愉快既足球同樂日。雖然無非常突出既演出，但各隊員整體叫做合格，個別更有漸漸上力既爭氣表現。

• 陳鍵：I have a dream…發表行政政策演說，勵精圖治改革球隊架構，犧牲在所不惜。本意良好，有待各隊員反應。
• 小岑：情緒受到控制，場內場外表現成熟，再無喪叫、亂跳… (據報受傷)
• 大老爺：一早起左身，無遲到，比救出幾多球更值得嘉獎。
• 肥仔：近來出席率好很高，莫非服刑期滿﹖
• 阿賊：烏合之眾最瀟灑球員。成隊波響哂度，竟然可以同個三唔識七既人搓波仔。
• 朱生：兜野踢落陳鍵後腳，勇氣可嘉。濕滑場地反而射出靚波，可能係雨水沖走沙石所致。
• 昭強：第一次帶con，好安全，但有D唔慣，總係好似有D野挭住挭住。
• 阿Ken：似乎對隊友好不滿，隊友失球後經常怒目相向，有時仲嬲嬲地自己亂咁扭。小朋友，如果個個踢得差都要啤下，你有幾多對眼呀? 踢波要相信隊友。(經了解後證實當事人無此想法)
• 徐乙：技術其實真係唔差，可惜走動真係太少。係一架唔著既林寶堅尼。
• 阿良：出手啦，終於出手啦，終於矛啦。
• 阿Lee：未夠鐘開波飲餐茶先，享受人生。

場場保持今場既輕鬆愉快心情去享受足球，總好過嘈交勞很氣。勝負，唔係淨係睇幾比幾既。.... ... ... (喂，今場幾比幾啊????)

00年2月13日（修地）黃衫

阿叔都無眼睇，小勝一比零

到：鍵、岑、肥、賊、朱、慶、昭、Ken、良
無：拉、鬼、Lee、蕭、B、Rick

烏合之眾響久疏戰陣既情況下踢來無里火氣，其實咁樣比平時燥火但落力更唔掂，只不過對手較弱先變成我方控球時間較長。如果對高質既對手，咁既狀態分分鐘比人搓到癲。由於場波實在太不堪入目，攪到響修頓打躉幾廿年既阿叔都無眼睇，情願眺望遠處籃球場既賓姐，結果踢成點都無人被小。

好在阿Ken臨尾被對方從後鏟低大發難渣，先叫有D睇頭，而賽事亦由於對方即撇下草草完事。賽後烏合之眾行政人員老昭曾越洋追訪資深開拖人仕泰仔康，泰仔康以專家口吻建議以後再有同樣事情發生，應該踢埋場波兼打埋場交先好比人走。

表現

鍵─右閘，突破自己，終於第一次同黃衫踢而無勞很氣。控、傳俱佳，解圍亦清脆。如果球隊執迷不悔係都要踢控球在腳小組足球，陳鍵係閘既理想人選。

岑─啦士，咪睇今場波岑生唔聲唔聲，包抄非常準確，清波黎講做足本份。今場波踢來冷靜，無咩出錯，係傳送方面仲要下D苦功。

肥─龍門，由於對方攻擊疲弱，甚少受威脅。係一開波自動請纓守龍呢下幾出奇。中段時間有球門前一輪混亂下比人射中柱，令小岑勾起傷心既往事。不過講時講，肥仔守龍有鬥心，所以亦令隊友有信心。

賊─中場，狀態低沉，今場波無個人突破，亦鮮有美妙既傳送，可能係隊友支援較少。補位方面尚可。

朱─中前，表現不過不失，開始有D組織意識，諗下點攪個波，控波能力提昇左。間唔中依然技癢有亂黎既舉動。整體黎講如果朱生踢得好，對隊波好有幫助。

慶─左閘，穩穩鎮鎮，對方攻擊弱受到壓力亦少，對住扭海鮮花既前鋒其實唔算太洩卓，反而對住實實在在下下快放既翼就危D。好幾下搓橫空位隊友搏得唔少掌聲，不過控同帶仲差少少。

昭─左閘，同樣由於對方攻勢弱可以有位頻頻助攻，幾下去到起腳範圍可惜射出無奶力波。有番一定控球能力踢閘算唔錯，最好速度方面可以快D。

Ken─前鋒，企個位太深，好難交波比佢。隊友一路帶波上前，佢就越走越深，係拉空左位比隊友起腳，但變成下下都係白走。回轉隊友時整色整水後腳即彈，最幣係交唔到。睇得出好落力，但往往操之過急。可以試下返多D，或者索性踢中場。值得一提今場波少人老味既次數多過射門次數，有烏合之眾本色。

良─中場，每場都保持到一定水準，今場波亦能保持中場既機動性，無話hold個波太耐拖慢節奏。今場波無左平時同阿Ken造既精彩one two。有野勁射中柱無功而返。

整體
以今場波有三：

一. 傳、控、射既基本功差。走精面係前鋒練控、射；中場練傳、射；後衛練傳、控。
二. 力，呢下無得走精面。
三. 狀態既穩定性。高昂士氣可以維持隊友既穩定性。

最重大發現：始終最緊要開心!!! 好!!

00年1月30日（主場西）鬼良之友

六比三

是日不愉快，想寫唔寫之間覺得如果大家唔開心，無論踢得比屎更差或比"甲組"再好都無心機提，場波已變得無意思。

本人(老編暨 I.T. 部主管) 堅持大家在愉快低下成長。就此擱筆，收皮，欽此。