99年12月26日（主場西）B友

拆禮物日，中山公園對徐B朋友，風和日麗，小勝二比一

有到： 小岑、阿Lee、阿賊、朱東、蕭丹、昭強、徐B、阿良、阿林、游生(嘩!)、游太(嘩嘩!)、阿康(嘩嘩嘩!)

無到：
陳鍵，返大陸 - 不合理
黑鬼，眼醺 - 不合理
肥仔 - 當然不合理
鬼佬，唔得閒 - 不合理
阿Ken，老婆病左 - 不合理
老爺 - 當然合理

今場賽事由遠渡而來既游生游太監場，烏合之眾不負所望響先落後一球既情況下反勝二比一。不過好多時候都係失波在先，証明烏合之眾一日唔失波一日仲嘆緊野。鬼良初段比對方撞親嘴部小爆，即時掛靴，幸無大礙。死老野、死肥仔及陳鍵均無出現，再度以車輪龍門戰術。唔係辦法喎!
另外值得一提今場波正宗真後衛只得小岑及昭強兩件，三線過度唔平衡。

球員表現：
小岑─ 持續有穩定既演出。全場波甚少出錯，係啦士最緊要既工作。包抄照例非常清脆，分波亦開始見到功夫。有幾球成隊走漏哂對方前鋒，得小岑一個力壓下對方射出界，應記一功。又有球底線附近拍低對方前鋒奧雲，對方堅稱此舉可能引致死亡。

阿Lee─ 踢中場越來越發揮到作用。相比起其他球員，阿Lee比較積極向前造，雖然有時幾夾硬，但亦可以平衡番其他人有時略嫌過多既橫搓。射入致勝一球頗突然，中場過少少右邊遠射得手，對方神勇龍門反而唔為意就咁入左。

阿賊─ 技術方面無話可說數一數二，踢中場多次利用邊線推進，製造唔少威脅，效率好高。單對單過波亦有一手，不過踢閘時略嫌友善，請向小岑學習。

朱東─ 再次水準之作。其實業餘波大家咁高咁大，只要肯搏肯勇，唔會輸蝕好多。初段輕輕發揮到二傳既作用頭鎚 set 波，更有直接攻門頂出靚波，可惜被對方龍門擋出。期間摞入一球。後段鵝眉月射出靚絕近柱地波，又被龍門撲出。

蕭丹─ 表現不過不失。活動範圍太細，隊友昭強曾親眼目睹蕭丹意圖轉身，但重型拖頭加上40呎拖架偷極位都掉唔到頭，相當辛苦，浪費左本來唔錯既腳下功夫。

昭強─ 左右閘都踢勻，亦表現稱職。踢閘多左位上，再次發揮出唔錯既助攻能力。有球波前場右路接應隊友傳送再即時撞比徐B，幾有球味。無有識死重演童年同蕭丹整 one two，諗起當年情景都心寒，仲有D痛添。臨尾發神經後場危險地帶扭失，被對方單刀，好彩阿康發神威擋出，否則肯定即時向場外擲界外球。

徐B─ 落場初段表現大勇，中眉中柱，又有回傳後上隊友組織唔錯既攻勢。後尾故態復萌：等車。無需理會。

阿良─ 好早就被對方撞爆嘴唇，即時退下火線送院治療。烏合之眾失去一名控球能力極強既球員下，中場分波能力大減。

阿康─ 流放海外後不復當年勇，甫出場即被老昭媽佢擅自走散，不過反而學識守龍，臨尾救出一球，同時救回老昭一命，信左神果然唔同。

阿林─ 有朋自遠方來，不亦樂乎。

整體
今場波本來大部份時間都踢得唔錯，攻勢幾多，亦有威脅，可惜略欠球運中眉中柱，加上對方龍門神乎其技既表現，只能小勝一球。不過防守意識太差，尤其中場迫得唔夠緊，對方可輕易去到起腳範圍。成隊波只有兩件正宗後衛，防守時好吃力。尾段更越踢越不知所謂，直情好似同條柴亂黎。

至於人選方面亦頗難攪。老慶做閘防守可以穩D，但阿賊就有助攻。中場鬼良都幾係必然正選，但小岑啦士之後又搵唔番個人響中場同人搶野。前鋒班友仔一時射死角一時射石仔。點...算...?

99年12月13日（摩頓台）肥仔朋友

星期一晚月黑風高，四比三終於贏番場!!!
昨日(12月12日)西區公園無記錄賽程，但都踢得好，辛苦大家。

有: 陳鍵、小岑、肥仔、小偷、靈格東、黑鬼阿慶、蕭十一郎、老昭、Ken哥仔、阿良無: 老野、鬼佬、徐B

今場賽事，由於對方唔知點解唔想掂倒我地，踢波竟然可以唔埋身，造成我隊成場波都可以好輕鬆咁踢。埋門機會非常多，唔能夠大比數勝出主要係前鋒把握力尚不足，同中場節奏控制未到家。都係自己累事，與人無尤，咪成日怨天尤人。不過姑勿論人地點踢法，烏合之眾各員表現算上佳，值得讚兩句。

龍門

如果有死老野就唔使比人入幾球，車輪戰不足提。係輪到火水東守時，強烈表現出唔識守既身手，被人老遠射入，反而十一郎救出幾球靚波。

後

黑鬼阿慶 - 防守力保持水準，清清楚楚 (與為人相反)，頭搥佳，試過助攻頭搥攻門。面對技術型前鋒時較吃力。波底唔太高，所以助攻時唔能夠發揮很大作用，但又比佢入倒球波。今次醒，等陳鍵閃左之後先接應 (由肥仔叫) 阿賊橫傳左路撞入。肥仔事後唔抵得，控告佢擅離職守，反被控<教唆他人>罪名。

小岑 - 再次表現大將風範，十一郎場邊攤抖時有感而發。作為〝啦士〞，踢得淡定，解圍清脆利落 (註: 是日省死豬東及慶哥合共兩件)，交個波正正經經，後上射門強勁，就算有時走漏左一兩條街最後都追得番，隊友無後顧之憂，仲有咩要求?!今場搶哂鏡，最佳球員是也。

陳鍵 - 由於前場人才過剩，仍然要佢老人家屈就踢後，未能發揮佢最高水準。但呢個唔係踢得唔好既籍口。踢後時始終過於冒險。太唔穩陣，好多時入波失波都因佢而起。效率比以往差。因為怕返工倦…所以早走，返工快成為陳鍵既人生。

老昭 - 負傷上陣，右閘位。對住身裁差唔多既對手，通常會踢得較生猛。今場波無咩失誤，小岑硬淨既防守令佢可以多D參與助攻。發揮出翼衛既作用。是次為連續第五場無發脾氣，立此為據。

小偷 - 今場波無再跳奔奔，賽後訪問過後證實唔係有心事，大家都安心D。控制節奏非常好，快慢得宜。經常可以扯兩邊拉空哂，交個波落點準確。不過今場波mark人時唔夠恨心，有D就住就住。整體黎講同老昭兩閘加上小岑清波，呢條防線叫做可攻可守。

中

十一郎 - 贏幾場麻雀，久休復出，未受壓迫下踢出正常水準。箍個球幾穩，正如大笨象踏住隻蕉。禁區頂多次起腳照舊無功而返。轉身太慢，十幾手呔加吊機都掉唔到頭，懷疑無牌駕駛。

肥仔 - 幾唔掂下，亂交咁交，淨係識比前，以為好快，但交個波好Q難控。攪亂中場節奏。控波離腳，又拍唔番。中場防守由於極需體力，結果又係交唔出功課。賽後聲稱有沙入鞋，唔通又會影響視力?狀態咁差可能由於兼顧演藝事業…

阿良 - 場場波都保持高質。扭波技術全隊之冠，經常響邊陲發難，亦可以出到靚波。同阿Ken一兩次one two幾正。禁區頂省左幾腳，可惜未能建功。烏合之眾進攻靈魂。

前

靈格東 - 極多埋門機會，如果把握好D，點只入兩粒。幾次單刀都成功射中龍門 (i mean 守門員既身體)，不過走到個靚位己經係一大進步。正如多口隊友肥仔話齋，依家對佢可以再要求高D。優柔寡斷既右腳，心事太多，單刀都唔入；反而不羈既左腳，不顧後果自以為是把心一橫，省入兩球。有咩啟示呢??

… 從那天起佢戀上佢左腳，從那天起佢討厭佢右腳 …

Ken哥仔 - 一球進帳。為人單純，一心交波就一定交波，決定射波就無論點都射。典型單前鋒格，個人獨闖好過同人撞窗。射門能力極強，腳頭十足，有野左邊勁ban省中硬物 [後證實為對方龍門] 彈出。幾次埋門唔夠冷靜，如果唔係可以入多幾粒。射入埋齋一球接應小岑右邊出波頂入。

整體
如果對方唔拍得緊，就算高幾班波烏合之眾都可以踢得出神入化。但係一比人地迫下，明明好波過人都會踢得XYZ。點都好，今場波的而且確踢得唔錯，某幾位亦漸漸踢到入型入格。最重要係保持輕鬆既心情，踢得開開心心，萬事勝意，身體健康，為所欲為…

99年12月5日（主場西）B友

嘩晨早流流唔係呀

有到：陳鍵、小岑、肥仔、鬼佬、阿Lee、朱東、昭強、阿Ken、徐B、鬼良
無到：老爺、阿賊、阿蕭、黑鬼慶
( 老爺話以後無到要申請合理紙。合理事故包括前晚飲酒、打牌打天光；不合理事故包括唔知醒起身、要返學等，但老爺要返工又算合理，詳情要問老爺?? 總之肥仔用任何理由都係唔合理... )

星期日晨咁早12點開波，大家都未醒，重有D眼屎未抹淨，但估唔到響唔清唔楚既情況下，可能大家都唔記得左自己渣、唔夠氣等，竟然大踢爭氣波。雖然最後輸零比一，但各員表現值得一讚。

• 龍門： 由於老爺又唔到，採取車輪龍戰術不提也罷。但長此落去唔係辦法，應想辦法屈肥仔守。
• 肥仔： 初段清波，防守唔錯，亦憑著希臘神話英雄人物「克里斯」既身裁，多次同對方正面撞擊。但分波同幫波依然未符理想，如果以後繼續踢後，一係練好D分波，一係練好D氣踢閘。
• 陳鍵： 表現萬變不離其中。攻擊性球員，放佢響中場發板進攻，創造性無人能及，一記射球中眉非常漂亮，不過踢後時略嫌冒險。每場波表現都好穩定，但就較少可以帶動隊波。大家都知佢工作後情緒好唔穩定，如果可以更加控制脾氣，多講鼓勵說話，效果會更好。
• 小岑： 如果場場都可以保持今場既水準，完全可以取代老牌垃圾佬昭強〝啦士〞既位置，而且佢比昭強更硬朗、更清脆，非常有大將風範，射一記罰球直飛死角，惜被後衛柵出。隱憂係閱讀球賽能力、頭搥、同前途問題…
• 鬼佬： 其實間唔中都踢得唔錯，但經常表現慌失失。今場波防守未夠硬淨，進攻時更似乎避開個波咁款，太過信心不足。再加上比陳鍵媽幾句，更加愈踢愈差。老實講，如果佢唔自己首先建立起信心，隊友對佢都唔會有信心。
• 昭強： 表現不錯，幾肯幫波走位，但有時就演變成走散自由活動。多次助攻，但把握性略差。日後如果小岑清波，可以改踢閘，更加發揮佢既助攻能力。唔發脾氣既日子，都幾能帶動到隊波既士氣，但佢同陳鍵就好似兩個精神病患者，只希望佢地早日康復。
• 阿Lee： 心平氣和既時候，佢踢中場確係有一定作用，時有比出靚波，亦從來無唔夠氣既情況出現。踢法較似大場波，唔夠爽快。防守工作始終未夠，有時又矛得太礙眼，請注意。
• 朱東： 表現喜出望外，唔單只無話〝唉，由係咁樣〞，有野仲響前場右路通人坑渠連過兩件，絕對精彩。保持咁既水準，大家都會願意比晒D時間佢，要幾多有幾多。
• 阿Ken： 因為佢初黎步到之時踢前既表現簡直勇猛，所以最近佢狀態回落，變成幾令人失望。今場波控D波幾差，所以都回唔返比中場follow上，唔係太有貢獻。真係懷念佢舊底單前鋒一個打九個既日子…
• 鬼良： 是日精選，最佳球員當之無愧，完全係中場分波既教材。只要能睇通球賽，又有一定波底，淨係企響度分波呢下已經殺哂。加上又有番咁上下技術，得閒扭下射下，分分鐘拎埋世界足球先生。今場波表現100分。
• 徐老B： 雖然遲到，但今場波無再"完全獨食"，改善為"幾獨食"，已經令前場充滿生氣，直情開花咁滯。有兩次同鬼良one two，呢D先係波!其實條友信心好足夠，呢樣野係好重要，因為無信心就不如唔好落場。只要改善下過於獨食既情況，同幫多D防守，佢響前面係有一定作用。

整體
今場波有一樣好大既改善，就係唔再係先失一球就判死刑，而係踢到最後一分鐘大家仍然相信有得追。呢樣野可大可小，係爭取勝利既先決信念，係好朋友既信念。重有只要大家可以保持水準，隊波已經唔同哂，唔使話要有人好很勁至有得踢。踢得有癮左，互媽既情況少左，咁至係一隊波。

註：今場波有到既球員已各籌旗$20，立此為據。

聖誕姐姐

"大家踢得歡容D"