99年10月31日（主場西）蕭同學

小寒、勁燥

比面：陳鍵、老慶、昭強、肥仔、朱生、蕭公子、小岑、阿Lee、阿Ken、締
唔比面：老爺、阿賊、PK、徐B、鬼佬、鬼良

整體表現：無

部份球員體力差、部份技術差、部份位置感差、因此全隊表現士氣差、成績更差到輸六比二，但無人感到羞愧，無人在場上為隊波爭一口氣。

個人花萃：

龍門 - 由於老爺又老放，我方又用車輪龍門，以強哥落地飛身救波較有睇頭。

肥仔 - 初中末段都無應有表現，後期更死守邊陲唔肯行開，話要衝散條邊??????令眾媽聲四起，差D完左場又再有波開，事後承認乏力失準，但火勢未有因此減退。自己預計下場 (如果到的話) 會有氣有力，打好右閘 ??!!!???

昭強 - 脾氣時有時無，今期火燒連環船，指數想調整都好難。全場試過打中打後打龍門及打後備，但都無辦法打起隊波。總體黎講把掃把確實有DD咁多多銹蹟。下次會嘗試移入中場鎖住對方，留番小岑掃垃圾，及嘗試收收D火。

陳鍵 - 屬無氣力一類，自踏足社會工作後更甚。曾目睹對方個波可以踩住唔放，對此表示驚嘆。

阿 Lee - [同前十場評語一樣]

小岑 - 是日無好表現，有失波，有斷纜，但無放棄踢爭氣波。

老慶 - 因少出聲而較少成火箭把，本住講笑時講笑，認真時立即又認真，自己算做倒自己本份。

十一郎 - 只可以話佢是次成功帶左班勁人黎踢波，其餘表現屬低潮。

朱東 - 再度慣性失波後舉晒手投晒降交代，而唔諗下搶番個波返黎自己身邊好好做過，與性格可能有關。

阿Ken - 射入兩球。其餘時間有技術而無用武之地，對他人斷纜表現得無奈，不宜心急，宜多配合隊友組織應可發揮得更好，大家比D時間大家 ...

締 - 在後備席初度嘗試救火，慘遭無情火輕輕燒親。

整體要改善，就要時間，要付出，要收火，要好言提出解決方案，要在場上多提點，要走好D位防守，要體能，要準繩，要好多好多方面改善，請問大家有無心???

99年10月24日（主場西）B友

月黑風高 9-11，經過漫長抖暑，球賽再度開鑼。部份球員平時口口聲聲話自己幾咁熱愛足球，但到開波時梗有各樣那樣天時地利人和藉口，其中以肥仔為當中佼佼者。完場輸 3：4 算執番身彩

出席：陳鍵、小岑、阿Lee、阿賊、朱翁、黑鬼、昭強、阿Ken、徐B、PK、締

缺席：
肥仔 ─ 理由：阿妹返內地工作(人和論)。
阿蕭 ─ 理由：有D野攪。請注意有D野攪與整野不同，千萬唔好誤會。
老爺 ─ 理由：(節錄)「我仲返緊工呀!我岩岩先訓左幾劑咋!」??????
鬼佬 ─ 理由：不詳。
鬼良 ─ 理由：不短。

本場賽事烏合之眾最佳球員陳鍵當選實至名歸。作為一件右閘，竟然夠膽死入兩粒，相當於當然正選前鋒徐B一季既入球量，實在令人驚喜兼心傷。

龍門： 由於老爺無到，我方使出車輪龍門戰術，效果証實入四球閒閒地比人地。

陳鍵： 最有料到非佢莫屬。防守時無大漏洞，所入兩粒 更為高水準入球，值得一提。

第一球，徐B左路交阿Ken，阿Ken唔覺意漏左落陳鍵度，陳生起右腳作勢射，吸過一個，再左腳射掛網。

第二球，阿Lee中場右路一記急勁地波放入禁區，陳生又突然出現，左邊接近底線又係左腳抽射，又係掛網。

另外條友精神有D問題，成場波唔知因咩事笑逐顏開，加上又抽筋又整親手，節目相當豐富。

昭強： 愈黎愈唔掂。第二、三球失波都關佢事，明顯唔夠人壓。助攻時有一、兩次射門機會，但射出軟弱無力既波，龍門都唔到。唯一可取係呢條友開始懂得抑制脾氣 (無晒火)。

黑鬼： 表現一般咁上下，無咩意外之餘亦無咩驚喜。位置感有進步，助攻時走既位唔錯。做好D個人技術先啦!

阿賊： 初段負責清波，因側重防守無咩表現。中段返右閘，開始發揮應有既攻擊力，除數下醫院波外，長高波極準。另外原來條友防守時都幾辣下。

小岑： 可能係最有鬥心既球員。表現非常投入，場場都好落力。但最近好似有D信心不足，今場波未踢出應有水準，工作效率亦有D跌watt。因中場非常重要，而隊波都幾依賴條友響中間搶波同要人，所以條友表現失色隊波亦受到影響。

尾段乏力老抽，坐在場中久久未有隊友上前慰問，一時感觸大喝：「軍醫你x母電視機!」點知軍醫陳鍵傷得仲重，正響場邊接受深切治療。而賽事亦因此吹雞完場。

阿Lee： 好奇怪既一位球員。個人技術幾高，但落到場又唔係咁有實際作用。過於著重個人表現，少與隊友作小組組織。甚少防守，最後一球失波完全由得人起腳，天啊，點解…？場邊球迷異口同聲稱應矛時唔矛，唔應矛時反而走去矛，道出了隊友幾許心聲。

朱東： 仍然未有大起色，太多無壓力下的失誤。個人技術略為不足，忌喪推底線左腳出波，宜多環顧四周。

失球後每每仰天長嘆，未有即時追番波，此舉動該被小得最金。全場波無咩貢獻，係第三球阿賊後場右路放高波，朱生終於發揮所長頭鎚 set 比阿Ken，阿Ken連番施射後入網。

阿Ken： 表現回落，初段好少波踢，條友怪責隊友唔比波佢實在無理根據。箍得太耐，扭得太多，中場一失波即刻比人突擊，制唔過。後段幾次個人突破，有野射出勁度十足既中腰波，可惜角度太正被對方龍門擋出，Good try，Good try，我地啊，我地呀。

PK： 一開波自動請纓守龍，可能搏第日sick leave，但又確實有落地救波。之後落返中場無咩特別。再度以PK搏上頭版，今渾追波追到斜路仲唔收油，與人無尤。隊友徐B竟然笑佢，對方球員都睇唔過眼話徐B無人性。

徐B： 全場無影無蹤，直情唔知佢有到。企得太前，就黎企到人地龍門後面咁滯，想點？幾肯起腳，但梗係唔肯射中個龍門。少與隊友合作，下下自己去，一交波比佢，二話不說叫部的士：「禁區丫唔該。」唉~~~

締： 表現很靜…

整體表現：
其實家下踢波，無話要扭九個，下下射死角，但求每一個人做好自己本份，應控得控，應交得交，多D用腦，少D用事，多練好基本工，食少D煙，飲多D水，早睡早起，起身摺被 … …，就算輸都唔會太肉酸。可惜隊波太唔平均，經常斷纜。如果個別隊友唔快快操起，前景都幾灰暗。
另外進攻時全無章法可言，個別球員往往見前面無人交就自己推，情況同D細路仔踢波淨係識向前一樣，唔等下後面follow，又唔動下腦筋諗下點做波，結果一場波十個攻勢，兩個係對方破壞，八個係自己浪費。