00年1月30日（主場西）鬼良之友

六比三

是日不愉快，想寫唔寫之間覺得如果大家唔開心，無論踢得比屎更差或比"甲組"再好都無心機提，場波已變得無意思。

本人(老編暨 I.T. 部主管) 堅持大家在愉快低下成長。就此擱筆，收皮，欽此。

00年1月17日（修地）肥仔之友

星期一晚修地，入場阿叔二十九幾人，比數零比三。賽事因鬼Rick勇戰受傷加上輸到咁上下而腰斬。

有到：小岑、老爺、肥仔、鬼佬、阿賊、朱東、慶哥、昭強、阿Ken、阿良、鬼Rick

烏合之眾首創答問大會

問：點解今場波對方所入幾球都非常簡單清脆，搓空哂底下輕易射入？

答：對方技術較平均，基本功良好，每個球員都控得搓得。一隊波能夠做到咁已經有左贏既本錢，加上有一兩件高質既主力，業餘波黎講已算係強隊。相反烏合之眾人腳唔平均，又神經刀，結果神起上黎有時明星隊，有時那星隊。

問： 點解烏合之眾成日輸？

答：萬變不離其中，輸波有5大原因：
1. 前鋒唔識入波；
2. 中場唔同人搶；
3. 後衛唔得穩陣；
4. 龍門唔好身手；
5. 場波唔夠運氣。
今場波前4個原因都俱備，好在無第5原素，如果唔係輸10粒都有之。

問： 點解前鋒唔識入波？

答：無必入既雄心係主要原因。走動太少，到有時走到靚位但把握性又低。隊友交波上前，前鋒每每因為交得唔靚而完全放棄追番個波。對方響後場開始組織攻勢時前鋒又極少去迫人，對方可以好輕鬆易咁慢慢做。

問： 點解中場唔同人搶？

答：烏合之眾大部份既中場球員都有一個毛病，就係防守意識技術太差，有時甚至無做防守既工作。對方兩三下就去到起腳範圍，於是後衛局住撲出去，若果對方搓得兩咀就會形成比人勁搓既精彩局面。另外，中場太無耐性，下下向前湧，就算係交比人地甲組、馬納當拿、巴西山度士都死啦。

問： 點解後衛唔得穩陣？

答：致命傷係唔夠人身位，頭搥水平之下既隊友亦唔少。拍波唔得勇捍，解圍唔得清脆。烏合之眾意圖踢小組足球，但後衛控球能力太低，助攻能力薄弱，想由左右二閘開始做上去機乎唔可能。

問： 點解龍門唔好身手？

答：其實龍門好唔好身手都仲係其次，最重要係作為球隊既最後一個希望同信念，擔當起球隊既精神支柱。無論踢成點都要保持100%既鬥心，多D激勵士氣。好多時候，奇蹟每每由龍門開始…

問： 點解場波唔夠運氣？

答：點解要講運氣？

問： 點解咁好火，十次有九次都炒？

答：有人唔自制、有人唔在乎、有人唔出聲、有人唔落力。

問： 點解無人踢後？

答：當然唔排除真係無防守意識強既球員，但成班波由細到大踢小型球出身，個個都全場奔走人盯人啦，咪又踢得掂。所以估計好可能係壓力太大，唔願負上失波既責任。其實呢個係極危險既諗法，踢波踢整體，入波唔係純粹因為前鋒，失波都唔單單後衛龍門。隊友應該互相支持信賴，唔應該每個失誤都搵人頂。只要上下一心，邊個踢邊度又有咩所謂。

問： 點解硬係踢唔出隊形？

答：一來基本功不足，唔好話要扭九件，就算要正正經經交腳波準D都成問題。況且隊友大都各持己見，有人踢快波，有人嘆慢板，結果成隊自由走散。其實依家每個月都有固定賽事，應該定下方向，再用賽事試效果。好既就堅持改進，唔好既咪再諗過。就係咁簡單。

問： 上半場轟幾球、下半場慢慢搓可唔可行?

答：肥仔提倡既任何方案，都已經正式被官方取締。

問： 點解大家都贊成既制度，到最後無一個人跟住做？

答：就係因為無第一個人堅持，結果無一個人堅持。

問： 羸波係唔係烏合之眾唯一既目標？

答：應該講，踢波係烏合之眾既最大目標，但落得場就想踢得好，踢得好就想贏，贏得就想技術性擊倒，想技術性擊倒就要隊員爭氣，想爭氣就要身體力行。因為無身體力行，結果咩都無。

問： 烏合之眾前境如何？

答：出路一：革命尚未成功，隊友仍需互媽。出路二：嘻嘻哈哈，有時D野，無所謂啦!

問： 點解仲唔化？

答：因為仲未想住。

00年1月16日（主場西）B友

轉涼，二比二和局收場
有到：阿賊、朱東、昭強、徐B、陳鍵、黑鬼、阿Ken、老爺、鬼良
無到：肥仔(連續第N次)、小岑、鬼佬、阿Lee、蕭丹、鬼Rick。其中小岑同鬼佬均報稱唔斯酷，近來感冒菌肆虐，各隊友請保重。

入波功臣：阿Ken、朱東、(對方) 徐B!?

今場賽事，徐老B倒弋相向任對方箭頭。烏合之眾終於明白點解對方平時咁緊張唔比徐B入波，原來比佢入倒波係好鬼羞家…。可惜知道已經太遲，昭強失誤下比徐老B射入一球。好在後來追番，如果唔係強哥實聽查肥皂矣。
入第二球組織非常高質，好耐好耐都未見過咁高質啦!

老爺 - 久休復出，身手仲響度。所失兩波都係非戰之罪，亦救出幾球。始終有個正式龍門響度，就算後衛失哂位都仲有最後希望。

阿賊 - 好適合踢邊線，經常可以衝散人地條邊。雖然踢閘但經常可以沉到落對面底線出波。入第一球間接功臣。昭強中場近右路放直線落底，雖然略嫌大力但又比佢追到，再傳地波出黎，阿Ken好巧妙咁趁對方龍門封出時cheap入。輕裝一度到場，十分瀟灑。

朱東 - 身價持續上昇，好大機會變藍籌。多次睇通橫傳隊友，幾能夠運用球場闊度。走動唔少，雖然仍然有夾硬推，但以今場黎講絕對可以信賴。入第二球又係強哥發動攻勢，先響對方鵝眉月右路扣過一個之後交禁區頂陳鍵，陳生不慌不忙再傳更深既阿良，阿良第一時間撞遠柱朱東空哂，朱東再同條遠柱做三次one two之後整入左。請注意全個過程對方都掂唔到個波。
另外條友完場後強調曾經推過奧雲，無錯係快，但其實推過人只不過係為左下一個動作，可惜朱生每每就算推過人下一個動作都係落空。何必呢~何必呢~

昭強 - 防守力大倒退。作為曾幾何時烏合之眾防守靈魂，表現好令人失望，更因為拍唔到徐B比佢射入一球，幾乎斷送前程，真係要同神父告解。好在今劑無自暴自棄，陳鍵踢啦士後移右閘位亦多次助攻。完場前仲差D入波。最後一個角球猛然醒起前輩蕭丹教誨，一九走入對方禁區，接應阿Ken頭搥搧遠柱，可惜比對方後衛封柱擋出。

陳鍵 - 烏合之眾空中霸王，頭搥贏哂。踢法全面，最前最後都得。技術有番咁上下既同時，又夠哂狼死。今場波代替昭強踢啦士勝任有餘，亦為第二球既功臣之一。選佢做隊長啦!擺佢上檯啦!

黑鬼 - 先天性愛走散。助攻時亂九咁走，浪費氣力又無作用。今場波表現一般，主要係太被動，又經常失位，好難由佢果邊閘位組織攻勢。好快D操起控球能力。

阿Ken - 單前鋒踢得非常辛苦，但好有作用。大腳放比佢，90個%可以set番後，或者甚至控低自己去。今場多次頭搥 set 波，估唔到。入第一球有料到，確係前鋒人材。

鬼良 - 烏合之眾中場自由人。同陳鍵比防守力較差，但係射門能力好很多。響中場協助隊友即彈二傳，好似唔起眼但先見真章。唔會拖慢攻勢，又能夠個人突破試射。入第二球功臣之一。今場波昭強多次交醫院波比佢，差D送佢上路。

徐B (對方) - 倒弋相向，大踢爭氣波。射入一球之餘，亦有球禁區頂握過陳鍵起腳無譜出界。本身技術其實唔差，不過走動太少，除非射門觸覺真係可以逢射必入，否則作為一個球員，唔走唔郁咁真係無辦法可以當佢踢緊波。

整體
今場波最大既發現係朱東可以踢得好好、昭強防守能力不斷退步、黑鬼鍾意走散、後面唔夠人所以陳鍵都要踢後、唔踢清道夫成日誤會、中場無阿Lee攻勢較流暢、大家踢得好落力、之後食下午茶陳鍵條木咀好Q煩…

00年1月9日（主場西）B友

今天天氣呵呵呵，一比一勞氣收皮
有到：小岑、阿Lee、阿賊、朱東、蕭丹、昭強、徐B、鬼Rick、阿林、游生、陳鍵、黑鬼、鬼佬、阿Ken
無到：肥仔、老爺、鬼良

今場波可以話係肉很酸。落場個個意見多多，但若果換轉坐響場邊睇，實笑死人地。所以今場波完全唔想講好野，而係將每位人兄最唔掂既揚開佢，希望講左出黎個人會舒服D。

小岑 : 初段太前，無哂位置。
阿Lee : 甚少防守，一幫就矛。
阿賊 : 拍波唔狠，已經幾場。
朱東 : 兩野無氣，狀態不穩。
蕭丹 : 轉唔到身，交醫院波。
昭強 : 勞勞嘈嘈，影響軍心。
徐B : 依然故我，自私自利。
鬼Rick : 企得太後，過猶不及。
阿林 : 默契不足，幫助唔大。
陳鍵 : 身為二閘，未盡本份。
黑鬼 : 助攻亂走，不如唔走。
鬼佬 : 唔敢拍人，交波盲目。
阿Ken : 個人足球，唔得實際。
游生 : 場邊觀戰，差D訓著。

整體
踢出咁既足球，就算贏左都無很意思。落到場大家發表下係好事，但第一千祈唔可以打擊士氣；第二講得出要做得到。真係好希望可以錄低場波，之後自己睇番，再聽番自己講過既野，就知道根本上個個都係齋talk。

都係果句，一係就唔好講咁多野，開開心心咁踢下波仔算；如果要有要求，唔該要求下自己先。另外建議烏合之眾隊員如果連續三次唔到，又無合理解釋，作放棄論。以後條友講有關任何足球既野無須理會。係咁。

(特別鳴謝球評家"火水強"勞很氣唔寫又寫。)

00年1月2日（主場西）A-B

烏合之眾足球部為慶祝千禧年，特別於2000年第一場賽事舉辦〝千禧杯明星對抗賽〞。經天意兩隊陣容如下：

A隊：小岑、阿Lee、朱東、奧華馬B、阿良、森邱、肥仔、黑鬼
B隊：阿賊、蕭丹、阿博、鬼Rick、昭強、阿康、陳鍵、蕭丹友

另外又好榮幸邀請到王妃親臨主持開球禮。鬼佬、阿Ken、老爺千禧杯竟然都唔到，紀律小組組長肥仔應八號窗接見問話。賽果A隊二比一技術性擊倒B隊。

身價A
小岑 ─ 實驗結果最矛既小岑果然矛過第二矛既陳鍵。
阿Lee ─ 大打意氣波，演出比對外敵認真。
朱東 ─ 又射中柱，北角事件影響眼界至今。
奧華馬B ─ B隊最佳清道夫，包哂D波。
阿良 ─ 指揮若定，叫隊友唔好交比佢，隊友言聽計從。
森邱 ─ 射入20世紀第一球，可列入紀錄大全。
肥仔 ─ 為留力下星期更重要賽事，表現較沉。 (賽後記錄: 下場肥仔無到!!)
黑鬼 ─ 三催四請下姍姍來遲，與陳鍵分隔兩隊入球亦告終止。

身價B
阿賊 ─ 唔再跳跳紮，嚴重影響表現。
蕭丹 ─ 賽事最佳中場指揮官，一句「剩番5分鐘咋!」全體隊友瘋狂亂黎。
阿博 ─ 手車一流，掉頭技術比蕭丹有過之而無不及。
鬼Rick ─ 輸波，我地丫下、我地丫下。
昭強 ─ 閱讀球賽能力無出其右，洞悉最矛換第二矛絕對無著數。
阿康 ─ 肚皮勇救徐B一球後肚痾，證明個波唔乾淨。
陳鍵 ─ 頂入一球，有時D野，無所謂啦~~
蕭丹友 ─ Hi!

花邊新聞
造波衫事件又有新發展，加入森邱及阿康兩件，波衫終於造得成。阿賊及鬼Rick年前做既定期終於有著落。而由於各種因素，烏合之眾足球部高層經過公平審慎既考慮，決定暫時唔再造新波衫，直至另行通告。欽此。