09年4月19日（李鄭屋古墓） 對羅賓朋友

出席: CEO, Dee, Robbie, 老朱, 銳哥
比數: 3 : 7
入球: 羅賓（2）、外援（1）

星爺、Jacky、Karl臨場失蹤，球會保留八號窗問斬權利。

地獄庄作賽，搵左幾件年輕人外援幫拖。雖然有兩件唔錯，可惜烏隊各員深感被放飛機，初段踢來個心有條刺，好快就失左3粒。其中除左外援質素問題，後防默契亦係致命傷。不過唔使太傷心，起碼我地用左反證法，證明左平時Mark哥、阿Rex、老昭三人真係好有默契！（Rex哥唔該飲多兩碗雞腳湯速速歸隊）

落後3球後，開始喚醒對勝利既渴望。憑銳哥多番助攻側擊，羅賓中前場舞龍咁舞，CEO同老昭傾掂數穩番條防線，加上今場唔頒MVP唔得既老朱，連追3粒，一度追成平手！

由於對方人腳始終比較平均，加上外援仔愈踢愈唔似樣，結果被對手3打1、4打1、單刀等等，狂失4球，最後大敗而回。

CEO
上半段其實踢得好好，有返當年風采，扭幾件清清脆脆，兩次飛鏟精彩絕倫，「年度最佳飛鏟」大熱！可惜佢成日口口聲聲話自己體力差，其實體力差唔係死罪，最大鑊係極端唔穩定既精神狀態！隊友一有失誤導致失球，即時發晦氣兼出口傷人。打擊士氣，比踢得唔好，差一千萬倍。體力唔好，咪換人囉，冇人換，咪要求休息囉，技術唔好，咪踢簡單ｄ囉，大不了咪輸囉！希望CEO努力克服呢個纏繞多年既風濕舊患，大家一定無條件等你康復！

老昭
自問今場守得唔錯，一兩野半單刀，兩球近柱必入（咁滯），失左7粒，幾乎全部都係非戰之罪。衰在烏鴉口同老朱晒命，話除左空晒或者金球先入到我，結果唔係空晒就係金球！不過我無怪隊友，就算擺到明玩失導致輸波，都唔係問題。我相信，冇人係想失波既，只係一場波冇話秒秒鐘咁冷靜，只要整體來講認真ｄ集中ｄ，其實失波唔一定同踢得好唔好成正比。

銳哥
側擊力強，多次邊線發動攻勢，粗身大細上上落落，無功都有勞！雖然仲有間唔中危險地帶玩野失波，但整體來講我覺得今場銳哥踢得好！咁先係我心目中既銳哥！如果有辦法令到體力可以有少少改善，咁就好囉．．．
老朱
地獄庄、落雨、濕地、無石，開波前我都貼到老朱今場又試鬼上身！果然，今場踢閘，雖然之後仲有公司比賽仍然毫不錫身！除左勇猛既頭鎚、睇空晒搓兩邊、清脆解圍、回身追到盡緊迫對手之外，最緊要係，老朱今場表現出強勁既鬥心！眼神充滿怒火，眉宇間唔洩氣！憑呢兩點，就可以睇得出佢係百年難得一見既踢後奇材！（阿Rex係祖師爺）老朱，不如你試下多ｄ踢後丫，比人扭過，唔夠人頂，解圍漏油．．．通通唔緊要，踢後同守龍都好簡單，唔ｘ怕死就得！

羅賓
烏隊靈魂人物！場場都保持高水準，就算有時要佢孤軍作戰，一樣交足功課有餘！今場都無咩特別野好講，早期小弟覺得羅賓比較個人化，近來佢愈來愈有大將風範，除左球技超班，勝不驕敗不餒既高尚情操，係大家學習既榜樣！個人穩重左，於是乎條士啤呔都泵脹左。

總結
有邊個唔想場場都人腳鼎盛，個個都狀態大勇！？但係當出現好似今場咁形勢比較惡劣既情況，更加係隊友們發揮小宇宙既時候！我開名都唔怕，雖然有時老朱會踢到走晒樣，銳哥會係咁玩失，CEO會發晒老皮，小弟會手軟腳軟，Jacky會臨場放飛機．．．其實都無乜所謂。小弟守龍多年，技術見人見智，但係次次落力打氣嗌ｘ到隔離街都聽到，都係為左keep住球隊既士氣！大家唔好太介意踢成點、贏定輸，踢出烏合之眾既風格，就係Mark哥所講既快樂足球，先至係大家幾廿歲又要返工又要湊仔，都仲會逢星期日希望個天唔落雨既原因！

註：今場士氣唔錯，冇互小，只係小弟忽然有感而發，缺席隊友無須掛心！

整體表現：兩個半叻
開心指數：兩個半笑